新年新氣象，唔少人都想可以年頭行運行到落年尾。農曆年咁多傳統同習俗（派利是、買新衫、唔剪得頭髮⋯），無非都係為左黎緊一年可以好運啲。雖然一個人成功唔係完全取決於佢做／冇做啲咩習俗，但寧可信其有嘛！如果想2015羊年可以更加好運，不妨考慮以下MoneyHero 嚴選亞洲開運景點，羊年行運一條龍 ！

1. 伏見稻荷大社（日本京都）

如果你係做生意既話，就一定要去一轉伏見稻荷大社！呢個神社初初係起黎供奉狐狸神，亦即係日本代表「米」既神。不過，隨住工業取代左農業，就變左一個比商人祈求商業運既地方。廟入面有一個石球，你要心內面先諗一個願望，如果拎起石頭既時候比想像中輕，就代表心想事成。

冷知識： 根據傳統，唔少公司都會捐錢喺寺入面起「鳥居」，希望可以帶黎好運。所以寺廟入面咁多鳥居，形成左「千本鳥居」呢個咁出名既必影景點！不過最細既鳥居都要17萬日元，最大既重可以要價成130萬日元咁貴！

2. 龍山寺（台灣台北）

龍山寺既特別之處在於入面供奉既神佛非常之多，包含儒家、道家同佛教等等，諸神一家親。結果引黎好多人祈求唔同既野：求婚姻運、求順產、甚至求考試高分啲都有。

冷知識：想永遠都咁好運？你可以喺廟入面租一個蠟燭位，長期供奉香火，燒香拜佛。

3. Kruba Srivichai 雕像＠帕邢寺 （泰國清邁）

Kruba Srivichai係清邁好出名既高僧，有人重叫佢做「工程師僧侶」添，因為佢在世既時候除左寺廟之外，重起左好多橋，同埋開闢山路。佢既雕像宜家放置喺寺廟山腳，方便信徒許願祈福。如果佢地既願望成真，就會返去送花同埋木象還願。

冷知識：呢個雕像好受學生歡迎，特別係想考入清邁大學既學生，都會向佢祈求入學試合格。

4. 靈隱寺（中國杭州）

杭州靈隱寺最出名就係入面既笑面佛（又叫彌勒佛）。相傳摸笑面佛個肚可以帶黎好運，個傳說就係喺呢個地方開始架啦！呢個笑面佛其實係石雕出黎，有成60尺咁高。佢坐落喺近寺廟入口既石窟度，而成個石窟加加埋埋重有超過330個石刻造像添！

冷知識：相傳笑面佛其實係中國10世紀既一個和尚－－布袋和尚。雖然佢外表有啲古怪，但因為心地好同性格善良，所以好受人尊重。

5. 天壇大佛（香港）

如果唔想去到咁遠，近近地都可以去個天壇大佛。不過記住著對舒服啲既鞋，因為要行成268級石楷，先上到去大佛，睇到佛陀真身舍利。天壇大佛既地基分左三層，可以入場參觀。殿堂入面既「瑜伽鐘」重會每隔7分鐘就自動敲打一次，一共敲108次，目的係令凡夫俗子「解除108種煩惱」。

冷知識：天壇大佛高111尺，面向北面，有面向中國既涵義。佢既右手手勢係「施無畏印」，代表希望令眾生安樂無畏，普除一切煩惱怖畏。天氣好既話，喺大佛上面重可以睇到澳門咁遠添架。

－－－

今年農曆年有成4日假，好適合去個短途既亞洲旅行，順便去上面呢啲地方，行返個大運。記住要帶一張海外簽賬匯率好既信用卡，咁掃貨就更加方便。同埋為左安全著想，一定要買左旅遊保險先好去旅行！祝大家新年快樂，羊年發大財！