注意！匯豐信用卡里數兌換率改制

匯豐啱啱宣佈其信用卡將於下年改制，相信大家最關心嘅係匯豐信用卡里數優惠調整。如果大家都係用緊匯豐信用卡儲里數既話，就要好好留意喇！

由2016年1月4日開始，匯豐獎賞錢積分兌換亞洲萬里通里數的比率將會改變，由現時每$1獎賞兌換15亞洲萬里通里數，下調至每$1獎賞兌換10亞洲萬里通里數，優惠變相削減左三分之一。

換句話講，依家匯豐信用卡用戶要賺1里，只要消費$16.67，但改制後，要賺1里就需要消費$25喇。至於「最紅自主獎賞」計劃參加者，按現有優惠條款，於6大指定類別消費時（賞滋味、賞玩樂、賞家居、賞品味、賞中華及賞世界）可享有6倍積分優惠（Visa Signature用戶9倍積分），即消費$2.78（Visa Signature用戶$1.85）/里。改制後積分下調至消費$4.16（Visa Signature用戶$2.78）/里。（詳見下表）

至於「最紅星期五」積分計劃，按指定類別星期五消費11倍積分（Visa Signature 14倍）計算，用戶消費$1.52（Visa Signature用戶$1.19）/里。改制後積分分別改為$2.27/里及$1.78/里。

若果各位匯豐信用卡用家不想自己的積分「縮水」，就要記住於2016年1月4日前，將獎賞錢兌換做亞洲萬里通里數喇！