【100周年】抽唔抽中銀紀念鈔好?4大因素影響紀念鈔價值!

|Posted by | 全部文章, 媒體報導, 財經時事, 銀行與金融
Tags: , , , ,

香港歷代紀念鈔炒風回顧

今年9月除咗係iPhone 誕生10周年,其實亦都係中銀100歲生日,中銀香港早前已透露,為慶祝該行成立100周年,會推出紀念鈔,並確定於9月28日至10月18日期間接受認購申請。各位朋友又有機會抽籤購買,用作收藏、送禮或者「轉售」。MoneyHero,com.hk 絕不鼓勵投機炒賣,但始終係金融界盛事,我哋當然唔會錯過,而家就等小編回顧吓當年其他紀念鈔推出嘅盛況。

先講吓今次中銀香港推出嘅百年紀念鈔基本資料︰

1.紀念鈔會分為單張﹙共290萬套,每套288元﹚、3連張﹙共30萬套,每套988元﹚以及30連張﹙共4萬套,每套13,888元﹚,合共324萬套,發行量比匯豐HSBC前年發行嘅150周年紀念鈔(發行200萬張)更大。

2.申請者可於9月28日至10月18日在網上申請或分行交申請表,每位只可交一份申請。11月2日公布認購結果,收到通知才需安排付款。領鈔日期為12月20至31日。

3.如欲查詢認購的申請紀錄及結果,請按此並輸入香港身份證號碼。

4.認購上限為單鈔5張、3連張一套以及30連張一套。

5.只需年滿18歲而且持有效香港身份證嘅香港居民都可以申請購買。

今次發行量大,買到紀念鈔嘅命中率似乎較買到新iPhone高。響諗緊抽唔抽中銀百年紀念鈔之前,可以先參考下近年紀念鈔嘅轉售情況。

匯豐35連張賺近兩成 中資行出品更值錢

近年本港紀念鈔短期轉手價一覽表

紀念鈔 發行量 面額(HK$) 官方定價(HK$) 短期轉手市價(HK$) 利潤率
 中銀京奧紀念鈔 (2008年) 400萬張 20 138(單張) 200 至 450 +45 至 226%
1,388(35連張) 7,000 +404%
渣打香港150周年紀念鈔(2009年) 100萬張 150 280(單張) 200 至 260 -29 至 +7%
中銀百年華誕紀念鈔票(2012年) 200萬張 100 150(單張) 1,600 至 1,700 +967 至 1,033%
600(3連張) 4,000 至 38,000 +567 至 6,233%
6,000(30連張) 100,000 至 200,000 +1,567 至 3,233%
匯豐150周年紀念 鈔 (2015年) 200萬張 150 380(單張) 700 +84%
1,380(3連張) 2100 +52%
23,880(35連張) 26,000 – 28,000 +9 至17%

資料來源︰綜合傳媒報導

回想2015年匯豐發行150周年紀念鈔時,市面上曾掀起一陣炒風。果款紀念鈔面額150蚊,當年售價380蚊,35連張原價HK$23,880,首日炒價達26,000至28,000蚊,利潤都有9至17%。不過,隨後果款紀念鈔喺內地需求麻麻,回收價持續萎縮,35連張甚至因包裝攜帶不便而曾經被拒收。

相比之下,中資銀行推出嘅紀念鈔一般較受內地收藏家歡迎,所以轉售利潤一般較外資行出品為高。中銀香港母行 — 中國銀行喺2012年曾推出「百年華誕紀念鈔票」,面額100蚊,售價150蚊。呢張紀念鈔頭一個星期嘅回收價高達1,600至1,700蚊,轉手利潤率高達9.7倍至10.3倍。時至今日,一張普通編號嘅市價都仲有幾百蚊回報。

買賣紀念鈔小貼士

買賣紀念鈔之前最好留意以下嘅小貼士,錢幣市場比較特別,影響鈔票價格同價格走勢嘅因素多,未必樣樣你都知。

1.冧把靚唔靚最重要

同普通鈔票一樣,如果你買到嘅紀念鈔有一個靚嘅編號,轉售嘅價錢就會高啲。一般黎講,市場比較鐘意「順冧把」,例如如123456或345678;另外,如果尾三、尾四或尾五位數字係相同,例如XXX111、XX2222或X33333,轉售價都會較高。如果咁好彩抽到尾兩位、尾三位都係8字,即係88或888尾數,市價會分別高一倍及過萬蚊;相反,如果黑仔抽到4、7呢D傳統衰「冧把」,轉售價都係有一定折讓,折讓幅度視乎衰冧把所在位置,若4、7字出現喺編號最尾,折讓額或會過百蚊。

2.經濟影響紀念鈔市場氣氛

雖然紀念鈔有唔少本地收藏家追捧,但內地市場嘅需求始終遠比香港大。因此,影響紀念鈔價值嘅因素除左發鈔行同埋「冧把」之外,市價高唔高亦都要睇當時內地嘅經濟情況,例如股票、錢幣、郵票等市場嘅情況,如果以上嘅市場都好景嘅話,紀念鈔嘅轉手價亦會較高。

3.包裝亦會左右鈔票價值

正因為唔少紀念鈔被錢幣商或者炒家購入後會運番內地出售,所以唔少市場人士指出,紀念鈔嘅包裝亦好影響中間人嘅回收意欲,以至回收價。例如用硬卡紙盒裱裝嘅匯豐150周年紀念鈔35連張,就一度因難以攜帶過關而被壓價同拒收;反觀中銀紀念鈔連張多以卷筒包裝,就好少會俾人以上述原因或藉口壓價啦。

4.投資紀念鈔要有耐性

最後提提大家,根據歷史往績,紀念鈔嘅市價頗為波動,三兩日價格已經可以面目全非,但一年半載後又可能會有驚喜。如果咁唔好彩,買入嘅紀念鈔回收價「潛水」,變晒蟹貨,都唔洗絕望,因為過往唔少紀念鈔嘅市價都呈先高,後低,再回升嘅走勢。好似渣打喺2009年為紀念香港設行150周年而推出嘅150蚊紀念鈔,官方定價280蚊,頭果個零月已經潛左落200蚊一張,但一兩年後又反彈番去1,500蚊水平。因此,短期市價唔靚仔,可以短炒當長渣,俾多少少耐性,
都可能有唔錯嘅回報。

任何投資都涉及風險,平時想穩穩陣陣慳錢理財?可以即上 MoneyHero.com.hk 信用卡私人貸款旅遊保險按揭比較平台,睇晒所有最新優惠,先至作出理財決定!

相關文章︰【出糧賺著數】各大銀行 出糧戶口 優惠比較

相關文章︰證券行、銀行大鬥法:搵邊間炒 股票 至著數?

相關文章︰【投資比特幣】買Bitcoin 前你要知的8件事 

——

想知道最新嘅理財貼士,就要留意 MoneyHero.com.hk Blog!同埋緊貼我哋嘅 Facebook Page