冇戶口號碼點過數 ?電子支票幫到你!

MoneyHero

MoneyHero

最後更新於 09 May, 2017

 

著數同知識,冇人會嫌多,Moneyhero.com.hk 除咗幫大家定期搜羅信用卡優惠,仲會傳授一些理財產品知識,今次講下一款無咩人特別提過嘅產品—電子支票 (e-cheque)。2015年秋冬開始,香港金管局、香港銀行同業結算公司(HKICL)就聯同幾間主要銀行推出咗 電子支票,比市民免費 過數 。

比較信用卡優惠,相信大家都好有經驗,但比較過數方法有咩優劣,應該就冇咩人做過。電子支票對好多香港人嚟講係比較陌生,因為佢哋嘅宣傳唔清唔楚,就連我上司做開IT都要問返肥叔叔,電子支票係點嘅一回事。不過,肥叔叔第一日就有玩呢呢種過數方法,所以可以一次過為大家講解下,電子支票同實體支票過數以及網上過數有咩分別。

點開電子支票?

電子支票就係響某幾間銀行嘅網站度,用佢哋提供嘅編碼器,再以電子方式簽發嘅「支票」。如果你本身做咗以下程序︰

1. 申請支票戶口;

2. 登記咗「支付予第三者」同Set咗大過零嘅限額 (無嘅話,請落分行排隊填form);

3. 有啟用咗嘅網上理財編碼器 (無嘅話,請落分行排隊填多張form);

你就可以上網,登入銀行網上理財,撳簽發電子支票。

開票方式同紙本實體票都相似,都要人名、日期、亦可以寫備註。填完後,用網上理財編碼器簽名。如果成功,網上理財就會俾個貌似支票咁嘅PDF你下載。

電子支票個PDF個樣雖然係同支票好相似,但係無咗你個真簽名,亦唔駛印簽名出嚟!其實PDF入面係收埋咗一個加密咗嘅檔案,電腦係睇加密檔案而唔係票面個樣,你只要將PDF用電子方式傳去俾收款人,收款人就可以響佢自己銀行網上理財度入票,即係上載果一個電子支票PDF。上載完成就當係入咗數,然後大約一至兩個工作天,即係同實體票差唔多時間,就可以過到數。

延伸閱讀︰開票二三事︰抽居屋點解仲要用支票?

唔駛收款人戶口號碼都過到數

同電子轉賬(ECG)最唔同嘅係,如果收款人識用網上理財,兼可以上載到電子支票PDF嘅話,就可以唔駛戶口號碼都過到一個比較大金額嘅數。

當收款人無網上理財、唔識用網上理財、或者係佢嘅銀行網上理財無提供電子支票嘅上載介面時,都仲有得玩喎!只要有對方嘅銀行戶口號碼就得喇。

銀行同業結算公司本身就推出咗 電子支票存票網站 ,基本上任何人有電腦(或者智能手機,因為佢地有App!),就可以響存票網站註冊,加入收款銀行戶口資料,好似人名、收款人銀行同戶口號碼,就可以將個電子支票PDF上存,隔日過戶。而且仲唔單止係自己戶口,仲可以向屋企人、包租公、證券行等等入票!收款銀行基本上就係所有過到香港支票嘅銀行,所以亦可以「代人入票」,唔駛對方煩。

響電子支票推出初期,金管局仲整緊電子支付工具個規例同發牌條件,而除咗部份銀行外,特別大嘅幾間銀行都依然向隔日過數嘅電子轉賬收緊約港幣30蚊一次嘅費用、兩個鐘內特快轉賬(CHATS)仲要成港幣65蚊,所以,電子支票當時係唯一唔駛錢、唔會用晒、同埋唔駛落街都可以過到錢去其他人銀行戶口嘅方法,肥叔叔響電子支票推出之後果個禮拜就係用佢嚟交租㗎喇!

提供電子支票服務的銀行一覽

提供開發及存入電子支票功能的銀行網站

只提供存入電子支票功能的銀行網站

滙豐、中銀、恒生、東亞、農行、

南商、集友、永隆、富邦

創興

如果用緊其他無得簽發電子支票嘅銀行,都可以用銀行同業結算嘅網站去入票,手機嘅話,可以用佢哋 iOS 或者 Android App 都可以上載並存入電子支票!

——

想知道最新嘅理財貼士,就要留意 MoneyHero.com.hk Blog,同埋緊貼我哋嘅 Facebook Page