船上旅遊:5大安全事項逐樣捉

MoneyHero

MoneyHero

最後更新於 10 June, 2015

post_船上旅遊5大安全事項逐樣捉_blog

小編記得小時候,晚飯時間一定會坐定定,睇大台一套由張家輝同張可頤主演,喺郵輪上面拍嘅連續劇。唔知大家有無真係試過坐船旅遊呢?除了坐郵輪,其實船上旅遊仲包括埋坐船遊江河同湖泊。近年船泊意外都幾多,3年前香港嘅南丫島撞船事故、上星期中國長江沉船事件……好多人開始問,究竟船上旅遊安唔安全?今日就同大家講下5大安全注意事項:

開船前,乘客有可以做?

大家上到船,首先唔好興奮過度四周圍走。因為,有件事好重要,就係把握時間坐低喺自己所屬嘅座位上或房內,睇清楚有關緊急情況嘅小冊子,聽清楚海員同乘客解釋嘅緊急求生程序,包括船上嘅逃生路線、各個緊急出口、緊急集合點、滅火裝置、救生衣、救生水泡、救生浮具、同救生艇等等嘅位置。呢啲一定要了解架!唔好怕煩,因為唔知幾時用得著,知多啲就可能喺危急關頭能夠扭轉局面。

發生海難時,應該點做好?

大家第一時間要先盡量保持鎮靜同理性,再作以下動作。由於現今合乎規格嘅船,例如郵輪,應該具備左雷達聲納、GPS和衛星電話等先進儀器,要相信船長同船員喺危難時,可以好快聯絡附近嘅救援隊伍。乘客同時應該盡快穿上救生衣,並協助老人、小孩以及有需要人士穿上,到達指定集合處等候救生指示。如果船艙已經嚴重入水、破裂、傾斜或缺乏救生裝備,而有跳海嘅絕大逼切性,緊記盡量連同周遭嘅可浮物,從不超過5米高嘅起跳位置跳水,以避免身體受到額外傷害。

船上遇火警,應該點做好?

好多人都覺得喺船上有火災,比喺陸上危險萬倍,因為好似無處可逃。能夠做嘅係做好自身保護。利用船上嘅毛巾、床單、棉被、衣服,用水完全浸濕佢地,遮住口鼻,另外都要包住個身。然後就依照走火路線逃生,遇濃煙時盡量趴低而行,前往甲板等空曠位置。

同行有老弱婦孺,有野要留意?

千萬要確保小朋友、老人家、孕婦同殘障人士喺船程期間,都喺你地視線範圍裏面。好似郵輪咁大,走失就麻煩;船上旅客眾多,撞親可大可小;小型船行駛個陣船身會唔太穩定,一唔小心墮海就大件事。不過,通常大型船都有一些手帶派發俾呢類要注意嘅人士,容易被人識別。另外有船會提供免費托兒服務,視乎各位家長需要。當然喇,大家有乜頭暈身㷫,船上都有一定程度嘅醫療急救品,而郵輪呢類大船就有埋醫療室同駐船醫護人員提供協助俾大家。

登船出發前,買份旅遊保險

大家準備出發,探索浩瀚無邊嘅大海或者隱秘嘅湖泊之前,都建議考慮為所愛嘅人同自己買份旅遊保障,所謂欺山莫欺水嘛,點都要以防萬一。要知道,上船後,可能會有朋友水土不服,唔舒服又要食藥等等,可能又加多筆藥費。另外,船一開出後,可能有段時間唔泊岸,畢竟船上有唔少空氣欠流通嘅地方,有爆發傳染病嘅風險。大家有時間可以睇睇唔同嘅旅遊保險 – MSIGACEFWD同豐隆保險,因為佢哋都會包海外嘅人身意外同醫療費用。不過,有一樣要提提大家,就係盡量都坐一啲由合法經營,又有有效牌照船公司所營運嘅船隻,否則坐非法嘅交通工具可能列入保險不受保項目以內,絕對會影響潛在嘅賠償額。

最後,如果大家想認識更多有關香港嘅海事安全事宜,可以上下政府海事處網站。希望大家有個愉快又安全嘅水上旅程!

——

即上MoneyHero.com.hk,瀏覽更多金融產品(例如按揭醫療保險旅遊保險信用卡私人貸款)有關既資料!想知多啲慳錢貼士同理財建議,就要留意MoneyHero blog,同埋緊貼MoneyHero facebook page!