【強積金對沖專題】取消MPF對沖機制對你影響有幾大

|Posted by | 全部文章, 理財小貼士, 銀行與金融
Tags: , ,

取消 強積金對沖 機制對你影響有幾大

近期政界、商界同勞工界都議論紛紛嘅一個議題,就係政府有意修訂,甚至 取消強積金對沖 機制──或者正規啲叫「強積金與長期服務金/遣散費的抵銷安排」,唔再容許僱主以強積金僱主供款嗰部份去到裁員、結業時作為打工仔應得嘅遣散費同長期服務金嘅安排。

遣散費同長期服務金嘅定義計算方法,喺香港法例《僱傭條例》有列明,前者係畀做咗等如或者兩年嘅被解僱、裁員員工,後者就係服務五年以上嘅被解僱、裁員同埋因健康理由不能繼續現職及身故嘅員工。同時,法例亦定明,僱員喺同一時期入面,只可以收到遣散費或者長期服務金其中一項。

現對沖只沖走僱主供款,但包含供款所賺權益

「強積金對沖」機制可以「沖」遣散費或者長期服務金,係用僱主出錢供嗰5%,或者最多每個月千五蚊所累積落嚟嘅本金,同埋所賺蝕嘅金額,即係所謂「累算權益」。當中假設僱主另外有幫僱員以「自願供款」方式供落強積金度,咁呢筆僱主自願供款累算權益,都係會計埋落去可對沖金額度。

但係,打工仔自己每個月出糧所受嘅五點傷害(5%強制供款),或者係打工仔自己嘅所有自願供款,都係唔會畀對沖機制沖走嘅。

假設例子

假設路人甲月入HK$20,000,做咗三年﹙36個月﹚,人工不變、無花紅、無雙糧。MPF月供各5%,即係自己HK$1,000、公司HK$1,000。

喺第三年老闆唔續約,於是路人甲就可以申領長期服務金,即係以2萬月薪嘅三分之二 x 服務年期3年,長期服務金就係HK$40,000。路人甲個MPF戶口過去36個月增長咗4%,即係HK$74,800,當中一半係僱主供款同累算權益,即係喺過去36個月幫路人甲供咗總共H$36,000,同賺嘅嗰$1,440,加埋係HK$37,440,就會畀僱主用對沖機制扣數。﹙見下表﹚

現時強積金對沖機制

路人甲月薪︰ HK$20,000
受僱年期︰ 3年﹙36個月﹚
路人甲 僱主
供款率 5% 5%
每月供款 $1,000 $1,000
供款總額 $36,000 $36,000
MPF利潤﹙累積4%﹚ $1,440 $1,440
累計櫂益 $37,440 $37,440
總累計權益 $74,880  
長期服務金應得 $40,000  
減去僱主供款累計權益   $37,440
僱主需支付差額 $2,560

報導指,就正正係因為當年談判時多方都同意強積金可以對沖遣散費同長期服務金呢個安排,所以當年商界同意強積金僱主供款部份,令到強積金可以落實。其實呢個對沖機制喺強積金出現之前,喺部份企業退休金、公積金計劃都有沿用。而當年,可以畀到退休金計劃僱員嘅,都係一啲中型至大型企業先可以負擔得起──即係當時大部份嘅人退休安排都要自己搞掂晒。

強積金嘅落實叫做可以減低咗部份僱員日後退休時嘅經濟壓力,不過時而勢易,通脹壓力日益上漲、社會經濟結構改變等等,對沖機制越用越多,金額越玩越大,都令社會各界都對「強積金對沖」機制有相當多嘅意見。

新舊取消強積金對沖方案

前特首梁振英,以及現任特首林鄭月娥,都有喺競選期間提及處理強積金對沖問題。梁振英亦曾經喺離任前提出過一個具體方案,方案喺無連任下亦無從落實。而方案一見光就同時被勞資雙方強烈反對,例如勞方不滿提案中金額嘅計算比率由平均月薪2/3改為1/2,而資方就反對唔可以再直接同僱主MPF供款抵銷長期服務金或者遣散費、10年過渡太短等等。但係佢所列出嘅重點,就為之後公眾對處理強積金對沖問題時嘅討論訂落一套準則,包括MPF供款嘅處理、長期服務金同遣散費計算、政府用庫房補貼同補貼年期,同埋成個計劃嘅過渡年期,前後同中間嘅安排。

今年3月尾,特首林太就繼續就處理強積金對沖問題向傳媒透露修訂之後嘅方案,重點包括金額嘅計算比率不變,即係公式保留今日一樣平均月薪嘅2/3 x 服務年期,不過僱主要就額外為全體僱主嘅供款加碼,但並非入MPF,而係一個新設嘅遣散費或長期服務金戶口,過渡期就由梁振英提案嘅10年加到12年,而庫房嘅補貼亦都加碼。﹙見下表﹚

強積金對沖機制 vs 政府新舊撤對沖方案

現時安排 梁振英方案 林鄭月娥方案
僱主供款累計權益 $37,440 $37,440 $37,440
長期服務金應得 $40,000 $4-,000 $40,000
被對沖金額 $37,440 $0 $0
僱主事前額外供款 $0 1%
僱主事後額外支付 $2,560 $0 $0
庫房公帤補貼/年期 $0  79億/10年 175億/12年
路人甲最後可得 $40,000  $67,440 $77,440
長期服務金/遣散費上限  $390,000  $390,000  $390,000

當然,勞資雙方亦會各自對呢個方案有所保留同不滿,今次主要商界代表認為,新方案中額外對小微企業嘅現金流壓力大,建議按企業嘅能力同規模作唔同級別嘅補點,長遠嚟講應該撤消功能上同強積金僱主供款性質相近嘅長期服務金,過渡期同補貼期亦都要加長。

立法需時,打工仔有排等

今次嘅強積金對沖處理方案向完全撤消對沖機制可以話邁向咗一小步,至少,代表打工仔嘅勞方反對比較少(鬧政府無全民退休保障就係另一回事);而商界對撤消對沖嘅著眼點亦由先前嘅全力抗拒,表示可以討論額外供款去遣散費,或長期服務金戶口同對唔同規模能力嘅企業影響(要多啲、耐啲庫房補貼差額又係另一回事),勞資雙方同政府亦可能會對長期服務金嘅存廢作研究。但距離真係寫咗法案出嚟,交畀立法會由唔同光譜嘅議員們辯論投票,制訂法例再實行,可能仲要有排等喇!

 

——

相關文章︰【年度總結】比較2017年各強積金表現及回報

相關文章︰比較各大銀行出糧戶口優惠

平時想慳錢理財?即上 MoneyHero.com.hk 信用卡私人貸款旅遊保險按揭比較平台,睇晒所有最新優惠,先至作出明智理財決定!

想知道最新嘅理財貼士,就要留意 MoneyHero.com.hk Blog,同埋緊貼我哋嘅 Facebook Page