新年特別篇: 15個理財陷阱

MoneyHero團隊
最後更新 Dec 30, 2014

HK Financial Mistakes to Avoid

新既一年好快就到,不妨襯呢個重新開始既好機會,改變一下你既理財習慣。無論你賺幾多次都好啦,都有啲好方法,可以幫到你減輕一下財務既負擔。

其中一個好方法就係:回想一下你有啲咩常見既錯誤。其實好多時,我地既新年目標都包括改善唔好既習慣,而改善你使錢習慣,都係其中一個目標!以下列出左一啲常見既理財毛病,如果你有呢啲問題既話,喺黎緊一年,嘗試改善一下,可能好有幫助。

1. 入不敷支

唔少理財問題追根究底其實都係因為使大左。所以好好咁檢視一下,你到底負擔得起啲咩,又有咩係負擔唔起既。無論係家居開支又好,買野又好,用嚴格啲既標準去衡量咩係你需要,咩係想要。認清自己既洗錢習慣,就可以定個清楚啲既界線,同埋更加明確既理財目標比自己啦。

2. 同其他人比較

另一個管理財政失敗既原因就係:咩都要同人比較既心態。冇安全感,或者朋輩既壓力,都會令你想維持自己既面子,結果就買左一啲唔符合你需要/性格既野。其實你應該集中喺啱你用既野,同埋記住,為左面子就會走唔出呢個理財陷阱!

3. 「咩係預算?食得架?」

對好多人黎講,過份短視係佢地理財失敗既一大原因。無好好計劃預算,會令你無了期咁做一個「月光族」,搞到第時完全冇錢用。好好點算一下你每個月有啲咩費用要交、有咩債要還、同埋其他經常性開支。之後,根據費用既緊急性,將你既收入分配落去比錢。

4. 因為一時衝動買野

唔好因為一時衝動而買野!包括嗰啲細細件,你買左都可能唔記得既野。就算你買既野可能好平,如果習慣左讓步比自己一時衝動既感覺,長遠黎計,對你日常開支既預算好大影響架!

5. 借錢借過龍

無論點都好,應該盡量避免借錢。就算係好細既銀碼,或者你覺得自己一定還到既,都要試下拒絕借錢既衝動。金錢上完全獨立咁生活,可以令你喺使錢既時候諗得更加清楚。如果真係無辦法,要借錢既話,記得搵間有信譽既機構,借私人貸款或者銀行貸款呢類比較多證明文件既貸款,咁就可以安心啲。

6. 借太多錢比人

講開借錢,相信大家都會識啲有借無還既朋友或者親戚。雖然聽落好似好殘忍,但必須既時候,為左佢地好,你應該嚴厲啲咁拒絕!再加上,借錢比唔會還既人,好有可能令你自己既財政都陷入危機添,所以一定要小心。

7. 遲還卡數

之前我地都有其他BLOG文講過信貸評分既重要性,而準時還卡數就係經過驗證,可以保持良好信貸評分既方法。你可以由小做起,千祈千祈千祈,記住記住記住,唔好過左期先找卡數!之後就可以續步試下唔好只還min pay,每個月還多少少。同埋,可能有其他信用卡係更加啱你既。所以記得要比較唔同信用卡,睇下邊張信用卡既利息、年費或者提供既優惠,最符合自己既消費習慣。咁就可以慳多啲啦。

8. 比左錢先算!

無論你係比銀行手續費,定係買保險,都應該搞清楚你比既錢係要黎做咩。簽任何合約之前要睇清睇楚,同埋唔使怕,可以問下其他有金融知識既人既意見先,咁就可以安心啲啦。

9. 月費無底洞

長遠黎講,唔好買咁多奢侈品係好受歡迎既理財方法。但係日常支出都唔野少架。試下寫一張LIST,記低你定期既月費支出,同埋睇下有邊樣你係用得比其他野多。啲實用既費用,例如水費電費咁就無得走架啦,但係你係咪需要訂收費電視台,或者用分期付款黎買最潮既電子產品?呢啲就要諗清楚啦。

10. 冇積蓄應付緊急事故

大部份人都知道留低一啲錢黎應急係好緊要,但係好多時大家都未必會咁做,到真係需要既時候就太遲啦。Touchwood你突然間比人炒魷魚,或者要比好大筆醫療費用既話,你應該有一筆足夠自己(或者加埋屋企人)三個月用既錢。

11.   唔交稅

計劃你既使費既時候,記得留返一筆錢黎交稅,咁就唔使到時先頭痕冇錢交。但計交幾多稅既時候,記得有啲支出可以扣稅、有回贈或者免稅額等等…如果你份工係會自動既人工度幫你扣稅既話,記得問清楚會計部扣左啲咩費用。

12. 唔查信貸報告

香港有機構(例如「環聯香港」)可以為你提供一份詳細既信貸報告,列出你遲還左咩貸款/卡數。最好每年都睇一次自己既信貸報告,檢視一下有冇啲咩問題係你之前忽略左。

想知多啲點樣拎到信貸報告,信貸評分有咩影響,同埋點改善自己既評分,可以click呢度,睇下我地之前既POST。

13.   唔買保險

除左留一筆錢做應急之外,買一份好既保險,無論係醫療保險、汽車保險定旅遊保險,都係一個令你財政更加穩定既好方法。當你計好自己除左日常支出,每個月有幾多錢淨之後,就可以CHECK下唔同既保險計劃,搵一份可信,你又負擔得起,同埋保險範圍啱你既保險。

14. 唔考慮退休生活

二十幾歲出黎做野冇幾耐既人,多數都會覺得宜家諗退休太早。但問題係,如果你一路都拖住唔諗既話,可能十年之後都一啲為退休準備既積蓄都冇。所以儲錢準備退休生活,同儲錢應急一樣,都係好重要。但為退休生活儲錢,係等於你直接投資緊落去自己將來既生活度!所以唔好太遲開始呀!

15. 藉口多多

知道自己理財或者使錢有問題都未夠,最重要既係真係落手落腳去改善。向得個諗字say no,唔好再有咁多藉口,要改下自己既壞習慣啦。除左理財之外,呢個問題喺生活上都要多多留意。

———

成年流流長,點都會有啲時候唔小心做錯左啲財務上既決定。但其實呢樣野唔係咁大問題,只要你喺錯誤中學習(特別係大錯!),就可以重新企返起身,好好管理自己既財務。

準備好做多啲改善自己既財政狀況?試下MoneyHero既網上比較平台,搵出最抵既信用卡保險私人貸款等等…記得留意我地既blog,入面有更多最新資訊同埋理財小貼士!

MoneyHero團隊 30th December 2014 1594