聖誕特別篇:6招教你做個精明消費者

|Posted by | 全部文章, 理財小貼士
Tags: , , , , , , , , ,

HK How to Spot a Good Deal

聖誕節當然唔少得聖誕禮物!唔少商戶都深明呢個道理,所以喺聖誕節就會推出好多折扣優惠或者聖誕套裝,黎吸引大家消費。

就咁睇,呢啲策略好似令消費者又慳到錢,商戶既營業額又可以提高,雙方都有著數咁。但係,大家都可能忽略左一樣好重既野:唔係有折扣,就係抵買!如果唔小心,最後可能使突左都唔知。

所以下次拎信用卡出黎比錢之前,記住以下呢幾點,就可以做個精明消費者!

減價就要買?

首先,最緊要記住記住記住,唔好因為一樣野減緊價,就覺得要買。如果件野既價錢唔係喺你預算之內,就算好似減左好多都好,都千祈唔好買!換句話講,唔好比減價呢兩個字呃左,買左超過自己預算,或者本來唔想要既野。但如果你恨左買一樣野好耐,例如高清電視咁,又見到佢做緊7折喎,咁當然可以考慮係咪要趁住特價買啦。

係咪真係平左?

第二樣要記住既就係,標出黎話平左啫,但係咪真係平左?有時痴左「減價」兩個字,係為左吸引人買,但個價錢其實可能冇減到架喎。呢招超級市場都比人發現用唔少啦!你見到寫住「超低價」,但可能其實個價成年都冇變過。想避免做水魚?記住喺買之前去生產商既網頁,或者其他格價網站,比較一下價錢先。

「平」等於「好」?

無錯,好平既價錢係會吸引到你買野,但開講都有話:「平野冇好」。例如手提電腦咁,如果佢好平既話,多數規格都唔會好勁,可能連執相或者DOWNLOAD影片都窒下窒下,變相你會用得好辛苦。所以唔好淨係用價錢決定係咪要買一樣野,記得要考慮埋品質。重可以上網睇下其他人對件產品既評語,再決定係唔係值得用你既辛苦錢黎買呢樣野。

買一送一個陷阱!

買一送一係其中一個鋪頭最鍾意用既銷售技倆。但要記住兩點:(1) 世界上係冇免費午餐;你有比錢,就即係唔係送 (2) 唔好因為望落好抵,就買左啲本來唔需要既野。同埋,所有野都要適可而止,買一送一既恤衫,如果你買兩件,係會慳好多;但如果你一口氣買十件既話,成件事就完全錯晒(除非你係打算用一大批恤衫黎做聖誕禮物啦)。

買得越多,慳得越多?

唔少鋪頭都有啲優惠,標榜買得越多,就有越多折扣。例如你買夠HK$1,000,就送你$100現金卷咁。就算你本來淨係諗住買750蚊野,都可能會比個優惠吸引,買多啲野黎湊夠1,000蚊。雖然你得到100蚊回贈,但諗深一層,你係用多左250蚊黎換100蚊!其實最後都係使多左。所以如果你本來唔係諗住買大約1000蚊或者1000蚊以上既野,就唔應該為左100蚊回贈,格硬買夠1000蚊。

睇清楚優惠細則

有時睇睇下網購,突然彈個廣告出黎,話有「全部半價」,真係咪話唔吸引!但唔好因為咁就失去理智,記住睇下啲條款與細則。例如係咪免運費,或者你有冇其他費用要比?另外,好重要既係睇清楚係咪可以退貨或者換貨。咁萬一你收到有暇疵既貨物,都知道退唔退得,使唔使加錢先換到貨。

----

唔止聖誕節,其實全年都要做個精明消費者!希望上面啲貼士可以幫到大家,今個聖誕節慳返啲錢,又買到最抵既禮物!