電子煙係咪有害?

|Posted by | 保險知識, 全部文章
Tags: , , , , , ,

HK Are E-Cigarettes Really Less Harmful

唔知大家有冇聽過「Vape」呢個字?唔好以為係餐廳或者酒吧名,其實佢係由牛津字典選出黎,今年新鮮出爐既年度詞彙!根據牛津字典,呢個字既意思係「抽電子煙」,因為電子煙越來越多受歡迎,所以當選。「Vape」呢個字,源自「Vaporize,蒸氣化」,意思係「呼吸電子煙或同類產品產生的蒸氣」。 當然啦,食電子煙呢個熱潮,同其他新興既野一樣,都好有爭議性。有啲人話電子煙比一般煙安全;但又有人話要電子煙同普通煙其實一樣,甚至重提議禁電子煙!以下係一啲電子煙既資料,同埋世界各地唔同衛生機構做既研究。等MoneyHero同你一齊研究下,電子煙同普通煙到底有咩唔同。

香港電子煙法例

香港衞生署控煙辦公室除左負責實施控煙法例,重負責推行戒煙服務。控煙辦公室提醒公眾,「含尼古丁,並宣稱為戒煙產品的電子煙, 須在出售前註冊。」如果管有或者銷售未經註冊既電子煙,可被判罰款$10萬蚊,同埋監禁兩年。就算你用既電子煙係戒煙產品,即使已經註冊,都唔可以喺禁煙區度使用,否則會被罰款千五蚊咁多架!

美國食物藥品監管局(FDA)又點睇電子煙?

香港對電子煙或者其他尼古丁替補療法既產品都有條例監管,但其他國家既規例就冇咁明確。例如喺美國,聯邦政府同州政府就暫時未就呢個議提取得共識

今年4月,美國食物藥品監管局提出新既議案,想立法加強佢地對煙類產品(包括電子煙)既管制權。其他提議納入管制既煙類產品包括:尼古丁凝膠、水煙、雪茄、菸絲、同埋煙斗用既煙絲。如果議案獲得通過,咁電子煙就要經過FDA核准先可以賣,同埋唔可以賣比未成年人士。

其實早喺2009年,FDA已經發表過一份提醒公眾電子煙害處既文件。份文件話到,FDA擔心電子煙會令到更多年青人對尼古丁上癮,同埋表示電子煙入面可能有對人體有害既成份。

關於電子煙既研究報告

2014年,美國FDA既Dr Tianrong Cheng就發表左一份報告,評估電子煙煙芯、蒸氣、煙彈、其他由電子煙產生既氣體,發現佢地釋放既尼古丁、乙醛、亞硝基胺(TSA)水平都有好大分別。

另一個美國FDA既科學家,Dr. Priscilla Callahan-Lyon就針對電子煙對健康既影響做左個研究。佢檢查左44種電子煙,加上其他研究數據,得出一個結論:雖然電子煙冇普通煙咁多種有害物質,但唔可以一口咬定電子煙對人比較冇害。佢重指出,只就目前既數據,無辦法判斷電子煙對健康既影響。

另一個今年發表既研究顯示,靠電子煙黎戒煙既吸煙人士,比起用其他戒煙產品既人,傾向可以忍住耐啲唔食返煙。呢份研究支持左香港政府既觀點:電子煙其實算係一種戒煙產品,唔應該為左娛樂而食。

————

電子煙含有尼古丁,所以唔應該為左玩而食。以上呢啲研究顯示,電子煙作為戒煙產品,係相當有效。不過,有啲人就認為,需要進行更多研究,調查電子煙對健康既影響。

要戒煙,可以有好多理由,但其中最重要既,莫過於佢會對你健康造成長遠既損害。越早戒煙,你要因為吸煙而引致既疾病去claim保險既風險就越細。

另外,因為吸煙人士會比較大機會患上嚴重既呼吸道或者心血管疾病,所以如果你食開煙,又想買醫療保險既話,通常要比高啲既保費。無論係咪食電子煙都好,想慳返啲保費既話,可能及早戒煙先至係明智既選擇。