30分鐘到達!大阪市區+近郊溫泉攻略

|Posted by | 全部文章, 品味生活
Tags: , , , , , , , , , ,

30分鐘到達!大阪市區+近郊 溫泉 推介

轉眼間就到秋冬季節,如果呢啲時候去日本嘅話,浸溫泉當然係指定動作!大阪係港人大熱景點之一,喺溫泉方面雖然唔及箱根、伊豆出名,但其實大阪市區、近郊地區都有唔少溫泉熱點,加上每處嘅泉水功效各異,由「金湯」、「銀湯」到鐳溫泉都浸得到,最適合血拼、狂食後relax吓!


MoneyHero.com.hk以下為大家推薦四個大阪溫泉熱點,全部都距離大阪市最多1個鐘車程,咁大家就唔洗舟車勞頓,又可以即日來回或者短住一晚歎溫泉啦!另外,提提大家,大阪喺2017年開始收住宿稅,揀房時記得睇埋房價係咪包稅喇。

最近大阪市 | 伏尾溫泉

伏尾溫泉

伏尾溫泉由大阪市出發搭電車只需30分鐘,係距離大阪市最近嘅溫泉區。想像下半個鐘前你仲喺藥妝店掃貨,轉個眼就已經浸喺暖笠笠嘅泉水度,對於行程排得密密麻麻嘅遊客,絕對係方便又疏乎之選!伏尾溫泉雖然近市中心,但風光優美,好似置身喺森林一樣,大家可以喺露天風呂一邊浸溫泉,一邊望住山林樹景,感受大自然氣息。

伏尾溫泉嘅泉質屬於天然鐳泉同埋碳酸泉,泉水含有微量鐵質,浸溫泉時皮膚會慢慢吸收,有助改善貧血;另外,泉水對皮膚病、神經痛、關節痛等都有療效,亦有美肌效果。大家浸完之後記住唔好沖走泉水,因為入面嘅鹽分可以減低皮膚水分蒸發,幫助保濕。

嚟到伏尾溫泉,推薦大家一定要入住天然溫泉旅館「不死王閣」,睇到個名就知呢間旅館氣派十足。

伏尾溫泉

不死王閣早喺1963年就開始營業,有超過50年歷史,足見旅館嘅地位。呢度提供多種服務,配合唔同遊客嘅需要,例如日歸套餐就專為即日來回嘅遊客而設,遊客可以先喺和式房間休息,享用午餐後再浸溫泉,非常方便。時間充裕嘅話,就不妨入住一晚喇,除咗可以浸多幾次,一泊二食仲可以食超豐盛嘅會席料理。

伏尾溫泉

伏尾溫泉附近有唔少景點,例如賞櫻勝地五月山公園、紅葉名所箕面國定公園等,連親子遊客最愛去嘅日清泡麵發明記念館亦喺提供接駁車嘅池田車站附近。由於去京都或者神戶時都會途經呢頭,所以唔少遊客都會選擇喺伏尾溫泉住一晚作為中轉站。

不死王閣
地址:大阪府池田市伏尾町128-1
電話:+8172-751-3540
收費: 日歸套餐每人¥2500起
            一泊二食套餐每人¥8000起
網址:https://www.fushioukaku.com.tw
交通:由大阪難波車站坐地鐵「禦堂筋線」到梅田車站,轉阪急線「寶塚線」到池田車站,車程約30分鐘,最後乘搭免費接駁車直達。

入住大師級建築設計 | 天見溫泉

天見溫泉 南天苑

相比起其他溫泉地區,天見溫泉唔算特別起眼,但憑住呢度名氣十足嘅「南天苑」旅館,好多人都專程過嚟呢個平凡嘅溫泉區,就係為咗住佢!由大阪難波出發,只需要40分鐘即可到達天見溫泉,呢度四面環山,又有潺潺溪水流過,成為唔少遊客同當地人嘅避世之選。

天見溫泉

天見溫泉嘅泉質同伏尾溫泉一樣屬於天然鐳泉,可以促進新陳代謝、提升免疫力,對神經痛、關節痛、皮膚病等都有幫助。南天苑旅館喺明治時期由知名建築師辰野金吾設計,東京車站亦係出自佢手筆,至今已經有過百年歷史。旅館而家已經喺日本登錄為國家有形文化財,地位絕非一般傳統旅館可以媲美。

入住南天苑絕對係奢華體驗,因為旅館坐擁3000坪嘅日本庭園,女住客可免費租借館內嘅靚靚浴衣,喺私家庭園入面自拍一番。呢度嘅溫泉更主打24小時開放,遊客可以無時無刻想浸就浸!如果你揀一泊二食,夜晚仲會食到頂級時令食材。

天見溫泉 南天苑

雖然呢度氣派豪華,但唔好以為房價一定好貴,住宿每人每晚只不過¥7000左右,加埋早晚餐亦大約港幣1,000蚊,性價比非常高。但係,大家要注意旅館限定13間房,大時大節時可謂一房難求。另外,想豪住嘅話,可以預訂每日只限一組客人嘅「隔離特別室 清流亭」,客房內設有私人嘅露天溫泉,仲設有日式圍爐,風味十足。

天見溫泉 南天苑
地址:大阪府河内長野市天見158
電話:+81-721-68-8081
收費: 素泊每人¥7000起
            一泊二食每人¥15000起
網址:www.e-oyu.com
交通:由難波車站坐南海電鐵「南海高野線」到天見站,車程約40分鐘,出站後再步行約2分鐘到達。

日本古湯感受歷史 | 有馬 溫泉

有馬溫泉

有馬溫泉係「日本三大古湯」同「日本三大名泉」,亦係關西地區最歷史悠久嘅溫泉區,威水史之多、文化之深厚,都唔需要多講!根據史書記載,舒明、孝德兩天皇嚟過浸過都讚不絕口,豐臣秀吉亦極力打造呢一區。由大阪出發去有馬溫泉大約一個鐘左右,交通方便,搵唔到唔去嘅理由!

有馬溫泉嘅起源係同遠古時代嘅神仙有關,相傳有人見到受傷嘅烏鴉用溫泉水洗身,竟然幾日後好返晒!呢度嘅溫泉水含有七種泉質咁多,包括有鹽花物泉、含鐵泉等,仲有金泉(鐵鈉強鹽高溫泉)同銀泉(二氧化碳泉)。溫泉療效方面,以最出名嘅金泉銀泉為例,前者硅酸高可以提高保溫效果,甚至可以殺菌,而後者因為溫度比較低,可以促進血液循環,去水腫,深受女性歡迎!

有馬溫泉有七個泉源,分別係炭酸、太閣、御所、天神、妬、極樂同有明,遊客有興趣可以尋寶咁跟住地圖搵佢地出嚟。

兵衛向陽閣

溫泉區內最出名嘅酒店,必數兵衛向陽閣!旅館有700年歷史,咁耐以嚟經過多次翻新復修,先變成大家今日見到咁嘅建築。館內連足湯共有六個溫泉,更設有泡湯後休息區,浸完溫泉可以睇吓魚欣賞庭園景色,中午特定時間仲有梅子昆布茶飲添!館內設計風格以和風為主,走較為成熟路線,處處滲出優雅大氣嘅感覺。以咁嘅格局嚟計,佢嘅訂價都唔算好高,尤其係日歸套餐收¥8500但包晚餐,都叫物超所值啦!

兵衛向陽閣
地址:神戶市北區有馬町1904
電話:+81-78-904-0501
收費:日歸套餐每人¥8500起(包晚餐)
           一泊二食每人¥19440起
網址:https://www.hyoe.co.jp/traditional/
交通:由梅田車站坐阪神或阪急電鐵去神戶市神戶市新開地站,轉乘神戶電鐵去有馬溫泉站,全程一個鐘左右到達。

SPA主題樂園任玩 | 天王寺 世界之温泉(Spa World)

SPA主題樂園任玩 | 天王寺 溫泉大世界

想喺大阪鬧市浸溫泉,唔係無可能嘅!源泉屬「天王寺世界之温泉」,世界大溫泉係樓高八層嘅SPA主題樂園,除咗有唔同嘅溫泉任你浸,仲有水上樂園比你玩,單係按摩美容院就有13間。對於「溫泉痴」、講求養生嘅女士們同埋親子遊客嚟講,呢度簡直就係天堂!

SPA主題樂園任玩 | 天王寺 溫泉大世界

世界大溫泉嘅溫泉主要分為歐洲同亞洲兩大區域,每月男女輪流專用,另外亦會再細分主題如古代羅馬溫泉、地中海溫泉、日本溪流露天風呂、大檜風呂等,一定唔會悶親你。而日本唔少溫泉都會提供岩盤浴,呢度都唔例外,而且仲係集結咗韓國、加拿大、俄羅斯等八個國家嘅特色,包你身心都可以嚟個大放鬆。仲有,4至6樓分佈咗六個桑拿,其中Steam Sauna仲會每個月換主題,由1月嘅漢方去到12月嘅柚子,就算去親大阪次次嚟都總有驚喜!

SPA主題樂園任玩 | 天王寺 溫泉大世界

另外值得一提呢度嘅水上樂園,集合眾多精彩刺激嘅遊戲,例如估佢唔到嘅瘋狂滑道Panic Tornado同傾斜度達70度嘅滑梯。此外,呢度仲有美容院、健身室、兒童樂園同餐廳,玩足大半日絕對唔成問題!

地址:大阪市浪塑區惠美須東3-4-24
電話:+81-6-6631-0001
收費:3小時成人¥2400起、小童¥1300起;全日成人¥2700起、小童¥1500起
網址:https://www.hyoe.co.jp/traditional/
交通:大阪市營地鐵動物園前站、JR新今宮站、南海電鐵新今宮站直達。

延展閱讀:日本關西·九州交通卡大比併
延展閱讀:旅遊上網必備:全港最平 Wifi 蛋租借攻略

出發前記得購買旅遊保險!按此前往MoneyHero旅遊保險平台,一次過睇晒邊間最抵、保障最全面!

——

想知道最新嘅理財貼士,就要留意MoneyHero.com.hk Blog,同埋緊貼我哋嘅Facebook Page