2014年我最喜愛的14大理財貼士

MoneyHero團隊
最後更新 Jan 02, 2015

HK 14 Money Lessons from 2014

「還清債務,開始投資,訂立理財目標,獎勵自己。」喺2014年,MoneyHero同大家分享左唔少理財貼士,教大家儲得多啲,使得精啲,同埋改善自己既財務狀況。我地為大家整理左14大理財貼士,喺新既一年都唔好唔記得呀!

1. 訂立理財目標

訂立一啲實際既理財目標,無論係大又好(5年內買車),或者細又好(儲錢喺年尾之前買新電話),記住定一個簡單既目標,向住佢努力邁進!當你成功既時候嗰種感覺真係正過贏左世界杯!

2. 理財建議

俗語都有話:無人係一座孤島,淨係靠自己唔會生存到。理財都係一樣。理財建議可以幫你更有效咁管理自己既財富,同埋用喺更有回報既地方,例如存款戶口、股票、債券,甚至房地產。所以唔好怕開口問人理財建議!

3. 良好預算

學識點樣管理自己既支出。計好每月收入之後,將啲錢分配比啲固定既支出,例如:買食物/家居用品、水電煤氣費、屋租、卡數等等…唔好唔記得要儲返啲錢,同埋預留一筆錢黎應急。

4. 建立/改善信貸紀錄

想要建立一個良好既信貸紀錄,就要由申請信用卡開始。每個月都準時還卡數,等銀行知道你係可信既。咁做可以確保你申請私人貸款,提高信用額,或者需要其他服務既時候,銀行會易啲批。

5. 保障財產

你既財產包括你既物業、車、或者其他你投資左既野。一啲比較大既支出好值得你為佢地投保,無論係教育、家居保、車保或者為屋企人投既醫療保險。除左保險之外,重可以利用互惠基金去保障自己既財産。咁樣做,就永遠都有兩手準備!

6. 好好利用自己既專長賺錢

如果你有專長或者嗜好,可以試下用佢黎做下生意。織頸布,整寵物蛋糕,手作蠟蠋——無論係咩都得!你可以將自己既作品放上網,例如Etsy呢類網上交易市場。你重可以喺Redbubble, Zazzle, CafePress, Society6等等既網頁,將你既作品(t-shirt啦、杯啦、袋啦,甚至手機殼)賣出去。利用你已經有既技能賺錢可以幫你搵下外快,咁就可以儲多啲錢入戶口,或者用黎應急又好,準備退休都好啦!

想做生意但冇人打本比你?試下向銀行申請私人貸款,開始自己既生意啦。

7. 捐錢

喺2014年,其中一件最hit既事就係ice bucket challenge啦(#ALSIceBucketChallenge)! 佢令到全世界過百萬人關注同埋捐錢比同ALS(即肌萎縮性脊髓側索硬化症,俗稱漸凍人症)呢個疾病有關既機構。Ice bucket challenge係為左令一般人感受一下有ALS既人既感覺,同埋請佢地捐錢既。

喺2015年,你都可以繼續搵一個你認為值得支持既機構,捐錢比佢地。你可以每幾個月捐一次錢,又或者一筆過捐都得。捐錢唔應該係人地叫你先至做,而應該係你當佢係一份禮物,真心送出去比人。

8. 控制債務

立定決心還清債務,就算慢都好,都要還晒佢!你應該由你最大筆既債務開始,盡用還得幾多得幾多;同時慢慢比min pay,還返比較細既債務。有啲人會鍾意還左細筆啲既債務先,其實兩種方法都可以。只要你堅持還清啲錢,好快就變返一個冇欠債既自由人!

9. 為退休做準備

唔好淨係為左眼前既野,唔記得左未來!你應該盡早計劃你既退休生活。你可以喺銀行開個定期存款戶口,或者投資互惠基金,去幫助你既資產增值。咁做既話,到左退休既年紀既時候,你就可以好好享受年輕時既努力,安享晚年。

10. 學識「稅」係咩一回事!

聽到「稅」,一開始可能覺得好複雜或者好難明,你可能會請一個會計師幫你處理稅務,或者你既僱主會幫你處理好。你如果自己學識左,會有好大幫助!首先,你起碼唔使浪費錢請你嘛。另外,你重可以睇到嗰年自己啲錢用左去邊:用左幾多錢,有淨既錢放左喺邊,同埋你有幾多收入。當你報稅既時候,其實會令你更有理財觀念,間接幫你將來慳返啲錢。你亦都可以睇下申唔申請到稅務貸款,等自己財務有彈性啲,又盡到公民責任。

11. 比較各類保險

無論係醫療保險、汽車保險、意外保險或者旅遊保險,保險對於個人或者家庭都好重要。但係唔好人地買咩plan你就買咩plan;可能有其他保險範圍一樣,但保費低啲,或者有彈性啲既plan。好似你去買野咁,精明消費者都係最好貨比三家。

12. 搵方法增值財富

用已有既錢去搵更多錢。如果你已經好另慳錢或者儲錢,咁下一步就係,投資同增值財富。你可以問下理財顧問既意見,去決定咩投資機會可以帶比你最多回報,同埋符合你既風險需求。

13. 做你所愛

你最想做既其實係咩?呢個世界大把成功人士放棄原本既高薪厚職,去做自己鍾意既野。當然,咁做係有一定既風險。但如果你夠醒目同埋堅持到底,所得既回報可能超乎你想像!如果你唔覺得返工係打份工,而係做你鍾意既野,賺錢其實可以好開心。製造多啲機會去利用你鍾意既野黎搵多啲錢啦!

14. 獎勵自己

儲錢,買保險,交稅,還錢,投資等等係會令人覺得滿足,但喺適當既時候獎勵自己,可以帶黎另一種滿足感。勤力做野之餘,唔好忘記享受生活!以上咁多個理財貼士,其實都係為左令你可以改善自己既生活,同埋有機會享受人生。

————

2014已成過去,祝你2015年更加豐盛同順利!

MoneyHero團隊 2nd January 2015 1604