《英雄之家》第8回～小英話：「醫療保險唔少得，比較記住睇細則！」

「英雄之家」嘅兩公婆金小英同錢大雄，剛剛入完「廠」……不過係探朋友啫！佢哋離開醫院之後，就有好多感受，好認真咁思考有關醫療保險嘅問題。等我哋又了解下先……

大雄：「唉，見到阿堅好地地又要入廠開刀，個心真係好唔安樂，只好講一句：天有不測之風雲，人有旦夕之禍福！」

小英：「下，佢，割盲腸之喎，你講到好嚴重咁。小手術啫，抖兩日冇事啦，你見佢都精神番晒。」

大雄：「其實割盲腸都唔係小手術，應該算係中型手術。今次佢在私家醫院做微創手術，手術費約$18,000，醫生費約$34,000 ，住院費同雜費又$23,000，加加埋埋都要使7萬幾8萬咁多！」

小英：「嘩！咁佢有冇買醫療保險？」

大雄：「就係冇囉！所以你見佢都好愁咁，一下子要攞咁大筆錢出來，失晒預算。所以我咪話：天有不測之風雲……」

小英：「風雲完未呀你！話時話，我哋都要Review下我哋嘅醫療保險，睇下啲保障足唔足夠。年紀愈大，患病機會愈大呀！」

大雄：「老婆，我35歲啫，年紀唔係好大下話！而且我又冇食煙……我諗我而家買嗰份醫療保險應該夠用嘅。」

小英：「唔，都未必呀。你睇阿堅今次，割盲腸都要成8萬銀。你知啦，醫療保險唔一定賠到足架！」

大雄：「下？賠唔足？我以為只要買咗份醫療保險，就一定有得賠晒添，原來唔係？……咁如果以阿堅呢個Case為例，有買醫療保險的話，可以賠到幾多？」

小英：「答你唔到喎！真係要睇番唔同保險公司嘅唔同條款。簡單嚟講，醫療保單會列明唔同種類手術嘅手術費用賠償上限，又會列明醫生費賠償上限，仲有住院費同雜費等等嘅賠償上限，唔係就咁一條數賠，係要分開計……」

大雄：「咁，買醫療保險咪好難比較邊間好啲？」

小英：「都唔係嘅。最緊要除咗睇保費幾錢之外，要仔細睇埋各類賠償上限同埋細則，睇下邊一間嘅計劃最切合你需要囉！一定有得比較嘅，只不過要睇嘅嘢複雜少少啫！」

大雄：「咁我嗱嗱臨返去摷番我哋份醫療保險出來……俾老婆你睇睇先！」

小英：「又我睇？咁你返去做乜？又顧住睇波？」

大雄：「嘻嘻，又俾你識穿……」

小英：「我就嚟俾你激到肺穿窿要入廠！到時自然知道份保單可以賠到幾多啦，衰佬！」

（欲知後事如何，且看下回分解！）

MoneyHero.com.hk 比較番，揀到啱！

想知多啲慳錢貼士同理財建議，就要留意MoneyHero.com.hk blog，同埋緊貼MoneyHero.com.hk facebook page！