八、九十後置業上樓秘笈

「置業，其實係一件好開心嘅事。」

以上對白，出自早前紅極一時嘅九十後準業主。佢早前受傳媒訪問，話自己已打算置業，報稱大學未畢業就月入過百萬，已儲夠首期準備好上樓。

儲夠錢，置業，當然係一件好開心嘅事啦。問題係好多人覺得由宋朝儲到依家都唔夠錢畀首期嘛。

其實儲錢上樓有好多方法，我地MoneyHero就綜合各大傳媒報道，分析八、九十後「成功」案例，等大家早日脫離葡萄園，可以係嗰個幾百萬嘅單位，食住白麵包，享受生活！

1/ 首先，你要有個做保險高層嘅爸爸！

你以為又係「成功需父幹」咩？錯！如果你咁諗，你就一定係八十後（or九十後) ，唔捱得，成日諗住靠父蔭，唔識自食其力啦，想當年啲人抱住個波膽就游水落香港，邊有得靠爸爸？咪又係一手一腳賺層樓返黎…….

咁，要個保險高層嘅爸爸黎做咩？無錯，係畀你有個目標，可以不斷鞭策自己。23歲嘅「九十後」Brian，就係活生生血淋淋嘅例子。

https://goo.gl/99ozDY

人地爸爸「起初」完全無介紹任何客戶畀個仔嫁！所謂萬事起頭難，爸爸選擇係咁困難嘅階段都唔幫個仔，真係用心良苦！隨時係公司見到個仔會扮唔識佢添啊。吃得苦中苦，方為人上人，Brian畀人咁鞭策法，終於都憑一己之力突破事業盲腸，事業漸上軌道，仲識得用學生貸款投資股票添啊。

嘩，小編當年只係用學生貸款交學費，投資股票真係諗都唔敢諗，所以呢，有個識得鞭策你嘅爸爸係幾咁重要！

2/ 或者你以為你無得揀爸爸……..其實你可以同媽媽傾下

你爸爸係邊個，當然唔到你揀，不過你媽媽可以！你想發掘自己夢想，但家境唔好無力追夢？22歲嘅Clevin話你聽，唔緊要，只要媽媽改嫁有錢人就得啦。

Clevin出身於天水圍基層綜援家庭，連夢想都不敢有，但好彩媽媽再嫁後命運逆轉，13歲就可到英國進修，仲讀埋本地國際學校添。之後？佢終於成為飛機師囉！

https://goo.gl/PKtLBy

3/ 或者你父母婚姻幸福，咁你唯有追求自己嘅婚姻…….

要娶老婆兼買樓有乜條件？幸福嘅阿全話你聽，首先，你要有個做護士嘅女朋友。

https://goo.gl/FA0egS

阿全同護士女友Helen，一齊儲錢買樓（買到樓先結婚是常識吧？）Helen會食麵包當午餐，不斷加班，買過最貴嘅野係一對Timberland鞋，千幾蚊，儲左五年，儲左40萬。阿全就戒食早餐，行路返工，中午帶飯，最後二人六年儲左70萬，成功係屯門上車──仲有三十年要供。唔緊要，戒食早餐都諗到，戒多三十年，其實唔難。

4/ 或者你無護士女友，或點戒都戒唔到早餐…….

小編都知道戒嘢好難，啲港女又話港男不思進取北上尋夫，你想自求多福開源節流？嗱，記住留意我地moneyhero.com.hk嘅慳錢貼士同like埋我地facebook fanpage咪得囉！（速逃）