喺香港生活真係有啲Chur，大人細路都好大壓力，搞到啲父母都好緊張要幫仔女報 Playgroup 課程。既然錢都要照樣俾，不如搵番一間有質素、有保證同小朋友開心學到嘢嘅 Playgroup 啦！今日就同大家介紹下香港5間著名 Playgroup 學校，分分鐘仲可以同Eason、徐子淇嘅BB同班添！
Kinder U（銅鑼灣）
位於銅鑼灣嘅名牌Playgroup，Kinde U唔少名人仔女都曾經入讀，例如名模歐陽妙芝同琦琦個仔女都係呢間Playgroup嘅學生。追星族嫌唔夠明星？傳聞千億新抱徐子淇個大女李晞彤都有入讀架！作為精明嘅父母，梗係唔會為咗見徐子淇先亂報Playgroup啦。Kinder U主要用右腦學習法，提供Playgroup同Reading Club課程（分為國學同英文閱讀），Playgroup課程內容包括體操跳舞、卡片學習英文生字同數學。Kinder U仲有直系學校，係位於深灣同海怡半島嘅Rightmind International Nursery and Kindergarten。（地址：香港銅鑼灣禮頓道111號4樓全層）
Kiddo Zone International Playschool（銅鑼灣）
Kiddo Zone係另一間位於銅鑼灣嘅Playgroup，標榜採用英式教育，課程根據英國幼兒教育基礎去設計，最適合6個月至6歲嘅小朋友就讀。為咗配合英國式教育，連老師都係由外國直接聘請。除了請外籍老師，課程配合有趣嘅學習手法，塑造輕鬆學習氣氛。學校特別著重小朋友嘅5Q發展：IQ（智商）、EQ（情商）、PQ（體力智商）、CQ（創意智商）同埋SQ（社交智商）。名人學生方面，代表有大美人李嘉欣囝囝！（地址：香港銅鑼灣禮頓道111號4樓全層；銅鑼灣希慎道一號901室）
SPRING（灣仔）
日日都學ABC、123、Bo Po Mo Fo，悶唔悶啲呀？位於灣仔嘅Spring深信小朋友應該從小發揮身體潛能，學校提供Supersport、Sensory、Cooking同澳洲引入嘅KindyRoo著名課程，小朋友可以喺過千呎嘅學校，透過平衡木、彈床等以唔同嘅遊戲形式配合舞蹈同活動，訓練小朋友嘅肌肉協調、平衡力以及團體合作嘅精神。Spring其中一個賣點係學校以白、藍同青綠色為主色，大部份家具都係木製，令到整個環境變得溫和自然，一見到靚靚環境就更加有興趣參加啦！李嘉欣囝囝都有參與Spring啲課程！（地址：香灣仔告士打道181-185號中怡大廈3樓）
創閱學（中環、天后、太子、荃灣等）
成日聽到好多家長帶小朋友去Playgroup學英文，咁中文呢？今時今日，中文Fail都入唔到大學啦！創閱學嘅閱讀課程同普通話班就好了解一班家長嘅需要喇。呢間Playgroup嘅課程適合3歲至6歲嘅小朋友，內容包括中文閱讀、英文發音同記憶技巧學習。創閱學喺香港、九龍、新界都有分校，方便每位忙碌嘅家長。名人代表分別有Eason同徐濠縈個寶貝女！（地址: 中環亞畢諾道3號環貿中心2105室；太子彌敦道750號始創中心21樓2125-2127室）
Artco Gallery（九龍塘、何文田）
想小朋友全面發展？語文好之外，其他興趣都重要。再唔係現實咁講句，想入間出名嘅幼稚園、小學，其他技藝才能都好重要架。位於九龍塘同何文田嘅Artco Gallery，主要都係做小朋友嘅藝術培訓，包括繪畫、手掌畫、黏土、裁縫至陶瓷，一定搵到小朋友鍾意嘅興趣。名人代表方面，吳君如同導演陳可辛個女都有報Artco Gallery嘅兒童藝術課程！（地址: 九龍塘嘉林邊道8A1地下；何文田亞皆老街124H號地下11號舖位A2室）
（圖文提供：www.spacious.hk）
——
延伸閱讀：香港平靚正 親子活動 好去處
延伸閱讀：BB用品唔慳得？新手爹哋媽咪必讀購物指南
即上MoneyHero.com.hk，瀏覽更多金融產品比較資料！想知多啲慳錢貼士同理財建議，就要留意MoneyHero blog，同埋緊貼MoneyHero facebook page！
回到文章
