【大學生必睇】補習定政府兼職？5大最荀暑期工2025

暑假就到，不少學生都會趁考完試利用Sem Break去旅行輕鬆下，不過暑假流流長，唔想浪費呢個悠長假期的話，不如搵份 暑期工 賺下外快同經驗，裝備自己！為了幫大家好好把握呢個賺外快同學新野的大好機會，MoneyHero為大家搜羅了5大最筍暑期工俾大家參考下！

政府兼職：學生暑期實習計劃 / 政務職系實習計劃

政府專上學生暑期實習計劃，每年都會為香港同海外就讀全日制專上課程的香港學生提供實習機會。政府好多個部門，包括消防處、勞工處、環境局同律政司等，都有參與這個計劃。如果你有志投身政府機構工作，這段經驗就可以幫你了解不同機構的運作，而且人工亦相當吸引，每月高達港幣9,600蚊！參加部門會將實習空缺刊登於相關政策局/部門同公務員事務局的網站內，有興趣就要留意公務員事務局網站公佈，並記得下載申請書。

除此之外，大家亦可以報名參加政務職系實習計劃，參加學生同樣會被派到不同部門工作，但主要負責類似政務主任（AO）職務的工作。薪金為每月港幣9,600蚊，每星期工作44小時，如果OT更會有補假！雖然這個計劃已經於今年1月截止，但同學仔有興趣的話不妨提早為明年準備下，趁而家多參加社區/學校活動，獲選機會都高一點！

補習 / 暑期興趣班導師

依家好多大學生都會幫人補習賺外快，貪佢時間有彈性。如果你將來想做老師，這些教學經驗就相當有用。好多人補習都係經補習Agent介紹，或者上補習介紹網，例如經Tutor Circle尋補呢類中介平台搵學生。

雖然一般補習中介第一次上堂要收佣，不過每小時人工一般都有HK$100至HK$200不等，視乎學生年級、科目和你的學歷經驗而定。依家補習唔只限於小學同中學生，唔少大專生以上嘅學歷都需要補習，所以因應唔同嘅要求，導師同學生嘅議價空間可以好大，特別係大專生呢類比較專門嘅知識，得到嘅時薪比普遍零售兼職的時薪可以高好多！

如果唔鍾意同學生一對一補習，其實都可以考慮下補習社或者教育中心。每年暑假，這類機構都會舉行暑期補習班或興趣班，輔導學生做功課同温習，人工一般比私人補習低少少，但如果你有特別專長如速算、畫畫同手工藝，又或者精通語言（如英語和普通話），薪酬會再高一點！

港鐵兼職車站 / 月台助理 / 兼職大使

平時搭港鐵，相信大家都一定會留意到在車站大堂同月台幫手的車站助理。他們的主要職務係維持乘客上落車秩序同埋疏導車站人流。至於兼職大使就負責於港鐵站內設禮品換領櫃檯，要幫手接駁換領終端機、掃描器同鍵盤等，亦要處理禮品換領工作。點解話呢幾份工筍呢？一來呢幾份工時薪都有港幣57蚊，而且在職期間只要有工作需要就可以免費搭港鐵，計落薪金都幾吸引。二來份工入職門檻唔高，無論係大專生定中學生都做得，只要識廣東話、英文同普通話就得。港鐵而家都招聘緊相關職位，各位學生朋友有興趣的話可瀏覽港鐵招聘網站。

4. 游泳教練 / 救生員

炎炎暑假一到，不少人都會去游水消暑。呢個時候各大游泳學校、泳池同海灘都會聘請游泳教練或者救生員。游泳教練負責教授游泳班，時薪一般都有HK$100至HK$200，視乎經驗而定，如果有教練牌，薪金便更高。經驗較淺者則可考慮申請游泳助教，時薪亦有HK$70至HK$95。

至於救生員，康文署每逢夏季便會招聘季節性救生員，在泳池/水上活動中心的兼職救生員時薪達HK$79，而在泳灘工作的話就每小時有HK$83，每節工作時間不少於4小時。不過，救生員並非人人都可勝任，申請人必須持有拯溺總會泳池/沙灘救生章或以上級別證書，而且要通過視力、顏色分辨能力、游泳及技能測試。如果有有效急救證書，成功機會就更大。救生員的工作亦並非大家想像中咁簡單，始終人命關天，要時刻打醒精神，而且工時較長，有興趣的朋友要留意這點。

5. 馬會分行服務助理 / 顧客服務代表

馬會不時會聘請分行服務助理或者顧客服務代表，主要為處理行政文書工作、產品服務介紹及處理客戶查詢等工作，一般時薪都有HK$50以上，甚至有工作津貼，對經驗尚淺的學生來說頗為吸引。如果你對顧客服務相關的工作或者文書工作感興趣，相信都值得大家一試。想知道更多詳情，大家可以留意馬會招聘網頁。

其實暑期工選擇多的是，又何止5種咁少? 想搵適合自己的暑期工，大家就要多留意各大機構的專題招聘日及求職網。大專生亦都可以透過校內求職網尋找實習機會，自我增值。不過，人工高固然理想，但工作時學到待人處事或溝通等技能亦相當重要，對你日後投身社會很有幫助。所以大家搵暑期工的時候，除了薪金之外，也要考慮番自己的興趣、意向和技能！最後大家搵暑假工時，亦要提防求職騙案，所謂「邊有咁大隻蛤隨街跳」，如果招聘公司沒有一定信譽，而職位標榜無須技能但人工超高，便要提高警覺！

相關閱讀：畢業旅行點樣慳多啲？ Grad Trip 窮遊秘笈！

相關閱讀：唱K／睇戲／食飯／購物 最新學生優惠大集合

想知道最新嘅理財貼士，就要留意 MoneyHero Blog ，同埋緊貼我哋嘅 Facebook Page！