7個助你升職的遙距 / 網上課程

|Posted by | 全部文章, 品味生活, 理財小貼士
Tags: , ,

網上課程

當老闆考慮是否升你職加你薪的時候,除咗考慮你的表現,仲會睇下你夠唔夠進取!如果你利用私人時間去進修,拎到唔同證書的話,就可以讓老闆睇到你鍾意學新嘢、接受挑戰,同埋唔係淨係做完自己份內事就算,相信一定會加分!

以前進修代表你一定要5點準時放工,先趕得切去返學。但遙距/ 網上課程 的出現就改變咗一切。你可以喺自己公餘時間先進修,唔使影響到工作。有唔少網上課程仲係免費,唔使俾錢就可以學到嘢,真係袋錢入你袋!加上而家唔少名牌大學都會提供 網上課程 ,例如麻省理工大學、哈佛、史丹佛等等……試諗下你份履歷表寫住有呢啲大學的課程,會好睇幾多!即刻睇下MoneyHero.com.hk為你搵到的7個課程,為自己的前途爭取優勢!

1. IELTS英文考試預備班

開辦機構:香港中文大學專業進修學院

喺香港,英文如果比較好的話,工作晉升機會都比較大。所以如果有一個IELTS咁嘅國際認可考試可以驗明你嘅英文水平,係一大優勢。香港中文大學專業進修學院開辦嘅IELTS預備班可以喺4個月內完成,唔單止有齊課程筆記,仲可以上網交功課俾老師改!香港中文大學專業進修學院同時開辦多個課程,包括語文、商業、社會科學及教育等等……

2. 商業管理高級函授證書課程

開辦機構:香港管理專業協會

香港管理專業協會開辦嘅不同管理課程,幫你踏出成為管理層嘅第一步!課程十分多樣化,包括人事管理、市場管理、商業法等等……為期3個月嘅課程可以幫你更了解商業機構嘅運作同埋管理嘅要素。

3. 中國商法法律碩士(商業應用)課程

開辦機構:香港公開大學

呢個課程適合商務管理人員,同埋中小企業經營者修讀。課程提供中國營商必要嘅法律知識,同時著重實踐。課程可以喺網上用中文或英文修讀。

4. Better Leader, Richer Life

開辦機構:Wharton University of Pennsylvania through Coursera

呢個10星期嘅課程會教你點樣清楚表達你嘅價值觀同埋未來計劃,令你可以同人培養信任,係為咗幫你成為一個更好嘅領袖。相比起其他集中喺專業技能嘅領袖課程,呢個課程比較全面,目標係令學生喺生活各方面都成為領袖。

5. Successful Negotiation: Essential Strategies and Skills

開辦機構:University of Michigan through Coursera

談判係營商好重要嘅一環。透過呢個密西根大學嘅5星期免費課程,可以學到實際嘅談判技巧,例如談判策略、點樣寫合約同埋防止將來嘅爭議。

6. Financial Markets

開辦機構:Yale through Coursera

如果想進修金融及風險管理,或者想知道投資心理學同行為學喺市場係乜嘢角色,就要睇下呢個8星期嘅課程啦!呢個課程另一個吸引嘅原因係佢嘅影片係有中文字幕嘅,唔使怕英文未夠好聽唔明。

7. How to Build a Startup

開辦機構:Udacity

如果你唔想打死一世工,想試下自己創業嘅話,就一定要睇下呢個免費課程。課程會教新手企業家點樣同顧客交流,同埋創造自己嘅商業模式。

——

CourseraUdacity唔係唯一提供網上課程嘅網站。如果有興趣,可以睇下Khan Academy同埋EdX(有同香港大學合辦網上課程)提供嘅課程。雖然有啲網上課程係要俾錢,但如果可以幫助你嘅事業更上一層樓,絕對值得!