大忙人必睇!聖誕購物貼士

|Posted by | 全部文章, 品味生活
Tags: , , , , , ,

HK Shopping Tips for Busy People 無論係買生日禮物,定係聖誕PARTY交換用既禮物,送禮係一個留低好印象既機會。但最大問題係,有時真係好難搵到時間去㨂份特別啲既禮物,最後就會變左買最行、個個人都收過既野。唔想成日都失手?咁就要睇下MoneyHero既9個免費貼士,幫你用一半時間,買到一份特別既禮物!

收禮物既係朋友定屋企人?

正常黎講,如果你心目中有特定既收禮人,㨂禮物時既考慮應該都會有啲唔同。你諗下,啱朋友既禮物同啱屋企人既禮物都唔同啦。考慮買咩禮物既時候,除左收禮物既人既喜好之外,重應該考慮埋份禮物得唔得睇,每年送禮既慣例,收禮人既習慣,甚至由你地講過既笑話入手;咁就可以收窄啲選擇,唔使好似大海撈針咁。

多觀察

最好既禮物往往可以令人覺你放左好多心機落去,真係有留意收禮人鍾意咩,同埋係為左佢而特登買既。所以,觀察係好重要架!例如,你同好朋友去行書局既時候,佢係咪成日望住某一本書,但都買唔落手?或者,你細妹係咪迷上左食cupcake?㨂禮物既時候,收禮人唔為意講既一句野或者小動作,都可能係好有用既提示,會幫你㨂到一份好禮物!

買實際啲禮物

有時候,最好既禮物可能唔係收禮人想要既野,而係佢地自己都唔為意自己需要既野。所以,㨂啲特別啲既禮物都係好事!如果你有親戚裝修緊屋企,可以買一啲又靚又實用既家居用品比佢地,例如書架或者儲物架咁。如果你既朋友係比較有藝術天份既話,可以留意下有冇佢鍾意既美術用品、或者書寫用具可以買比佢地。如果真係諗唔到買咩,都可以送比較大間既百貨公司,或者收禮人成日去既鋪頭既禮券。

提前做足準備

你公司係咪年年都會搞聖誕PARTY?近期會唔會有家庭聚會?如果你有MARK低呢啲重要日子、特別聚會,就可以知道幾時需要買禮物。就算距離個聚會重有幾個星期,或者一個月,如果見到好適合既禮物,買定都無防!有啲人重可能習慣左,屋企永遠都會放幾份SPARE禮物,咁萬一唔記得買禮物,都可以頂一頂!講到尾,提前準備多啲,點都好過最後一分鐘先去買禮物。

作出新嘗試

如果你要送野比小朋友,可以諗成係送一個經驗比佢,而唔係送一份禮物。你可以買啲鼓勵佢地同其他人合作,或者要落手落腳整既野,例如board game或者手作仔咁。可以一班人一齊玩既遊戲,例如砌puzzle,摺紙,積木等等都會令佢地好開心。 就算宜家覺得幼稚或者無聊,第時諗返起都會係一個開心既回憶。

運用創意

如果你有特別既嗜好或者專長,就要好好利用!有藝術天份既話,可以畫幅素描做禮物,或者喺整本相簿入晒你地啲相入去,再手寫啲CAPTION,都係一份好WARM既禮物!如果你諗唔到一份最好既禮物,不如唔好限死自己要送一份禮物,改為大包圍啦!你可以試下整個福袋,即係將一個袋裝滿唔同小禮物,例如飾物、雜誌、文具、零食等等⋯咁就可以一次過滿足晒唔同願望啦。

上網搵禮物

有明確既送禮目標,又已經決定左買咩?買之前記住上網CHECK一CHECK!有時,網上既鋪頭可能會有多啲優惠(折扣或者禮券)。網上買野可以慳返啲行黎行去既時間,如果用埋信用卡,重可以儲分或者拎回贈添!不過記得最好幫襯出名既網頁,要有齊免運費,評分,安全交易系統等等⋯。

最安全既禮物:食物

如果你清楚收禮人既口味,例如佢地鍾意食甜酸苦辣、係咪鍾意食貴野、有冇食物敏感等等⋯咁送野食就係最好既選擇啦!只要你有空檔,就可以去甜品店或者餅店,買蛋糕、點心等等做禮物。記住㨂啲天然既食材,味道特別啲,同埋外型夠靚。如果你有時間,可以搵下鋪頭仔既手作野食,咁收禮人一定唔會喺第二度(例如超級市場)買過或者食過。

不恥下問

無錯!其實一句講晒,敢問就會贏!不過記得探口風既時候,要隱悔少少。如果真係比人估中左,不訪大方認左佢,好過比人地覺得你怪怪地。其實你會花時間搵禮物,已經足以令收禮人覺得感動架啦。如果係你,有人緊張你想要咩,鍾意咩禮物,你都會開心啦!

----

想知道更多慳錢慳時間既方法?記得痴實MoneyHero既Blog,拎更多理財貼士同埋建議啦。

鍾意網上購物?即刻搵張最啱用既信用卡,賺取奬賞!