【打工仔必讀】請管理好你嘅MPF

|Posted by | 全部文章, 理財小貼士, 財經時事
Tags: , , , , ,

打工仔必知嘅3大管理MPF事項打工仔日做夜做,無非都係為咗份糧,應付日常開支兼且儲錢結婚、買樓、子女基金,甚至退休。政府搞份強制性公積金,即係 MPF ,就係幫大家每個月係你份糧度率先扣走5%,然後顧主再揼多5%俾你,儲埋一舊錢就係俾你退休之用。不過,間中睇新聞你會發現「平均每個打工仔份MPF蝕咗……」其實,MPF多定少,除咗同你份糧有關之外,亦都係同你點揀、有無轉plan、你間MPF公司收你幾多手續費等等有關,管理好你嘅MPF,就等於管理好你嘅退休生活。

1. 上網檢查MPF戶口

MPF公司基本上會一年兩次寄一份表現總結表俾你,等你知道番你嘅MPF戶口情況;但係大家可以主動一啲,事關大多數MPF公司都會有埋個網上戶口俾你,等你可以隨時隨地上網睇吓你嘅MPF狀況;而轉plan轉比例其實都已經可以上網做埋架啦,唔係一開始揀完就無得再揀嘅。

 

2. 根據年齡設定MPF組合

有人會問:咁多隻基金可以砌自己個 MPF 組合,而我又唔識財經、投資嘢嘅,咁點搞呀?最簡單嘅方法,其實你可以從你嘅年齡入手。

每一隻基金除咗有佢基本組合成份同過去數年表現俾你參考之外,仲有一part叫做「風險程度」,因為有啲基金就係買國債,咁相對風險就會低啲;而有啲就係投資喺歐美、香港、大中華地區或者係新興股票市場嘅股市,咁呢種基金嘅風險又會相當高啲啦。

一般嚟講,若然你係後生仔、啱啱畢業出嚟做緊嘢大把時間先退休,又或者你覺得自己承受風險嘅能力比較高嘅話,你可以考慮喺你MPF嘅組合入面,揀中至高風險嘅基金比例多少少,而低風險或保守型嘅基金組合就少啲啲;若然係年紀大、夠錢等退休嘅話,咁就倒反轉揀低風險或保守型嘅基金比例佔比多啲,而中至高風險嘅基金組合就盡量少揀啦。

積金局提出過一條公式可以俾大家計一計股票基金、債券基金同埋保證或強積金保守基金佔你嘅MPF比例大約係幾多,就係用100減去自己嘅年齡,得出答案就係建議股票基金可佔整體比例。舉個例:假如你依家30歲,就用100減30,得出70呢個答案,即係話股票基金可以佔你嘅整體投資組合70%;但積金局都強調,呢個只可以作為一個粗略嘅參考指標,有唔明嘅話就最好問返你哋嘅受託人啦。

 

3. 收費會影響整體表現

所謂嘅受託人,其實就即係你嘅MPF公司,根據積金局資料,目前市場上有18間提供 MPF 服務嘅公司,而佢哋嘅收費各有不同,大家可以望望:

基金開支比率收費

 強積金營辦商  所有積金平均收費(%) 基金開支比率(%) 網上積金轉換服務
 海通  0.90 0.58-1.24
 中銀保誠  1.17 0.36-1.70
 東亞  1.17 0.57-2.51
 匯豐  1.19 0.44-2.46
 恒生  1.19 0.11-2.46
 景順  1.33 0.67-2.48
 安聯投資  1.34 0.96-1.78
 尚乘  1.36 1.23-1.78
 富達  1.40 0.21-1.58
 銀聯  1.51 0.83-1.99
 信安  1.56 0.83-3.05
 友邦  1.56 0.68-2.03
 永明  1.57 0.50-2.06
 交通銀行  1.64 0.92-1.96
 中國人壽  1.65 0.81-2.58
 美國萬通  1.71 0.74-3.48
 富衛  1.80 0.56-2.31
 宏利  1.80 0.68-2.67
 資料來源:積金局(截至2017年2月13日)

你返緊個份工所屬嘅MPF公司你無得揀,不過政府都推出咗「強積金半自由行」啦,以前份工份MPF隨時轉,依家份MPF又可以一年轉一次,為咗你退休著想,得閒搞搞份MPF,咪咁懶啦!

除咗MPF外,每年搞到打工一族最頭痛嘅相信一定係交稅!啱啱過咗農歷新年,話咁快又要交第二期稅,你準備好未?而家MoneyHero.com.hk同Citibank有獨家稅貸優惠,送你高達$1,000現金券。

相關閱讀:【 綠表 買居屋】置業不是夢 綠表人士購買居屋需知

 

想知道最新嘅理財貼士,就要留意 MoneyHero.com.hk Blog,同埋緊貼我哋嘅 Facebook Page