【2016大事回顧】香港10大 信用卡新聞

|Posted by | 信用卡, 全部文章, 品味生活
Tags: , , , , , ,

香港10大 信用卡新聞

想碌卡碌得精明,掌握最新信用卡優惠就唔使講,但緊貼信用卡相關嘅新聞資訊其實都一樣咁重要!好似匯豐同恒生就於今年年尾開始將網上繳費優惠嘅上限減至1萬,變相令獎賞金額大減;早排又有研究發現Visa信用卡有安全漏洞,鍾意網購嘅朋友可能面臨信用卡被盜用嘅風險……MoneyHero.com.hk為大家總結咗2016年10大信用卡新聞,精明嘅你一定要知!

1)長期冇碌卡要小心,銀行按新例向不動戶Cut卡

如果你手上有長期唔用嘅信用卡就要留意,根據今年1月起實施嘅《銀行營運守則》,發卡後18個月內冇用過嘅信用卡,如果在銀行通知後仍無結欠或活動就會被Cut卡,措拖實行後結果令唔少銀行嘅首季發卡量下跌。其實只要你平時有用信用卡簽賬,銀行通常都會酌情豁免年費,如果真係用唔著就取消張卡,一年之後又可以全新客戶身分享信用卡嘅迎新優惠。

 

2)渣打與亞洲萬里通合作,掀儲里數熱潮

鄭秀雯擔任渣打亞洲萬里通萬事達卡代言人渣打亞洲萬里通萬事達卡

渣打銀行今年3月同亞洲萬里通合作推出渣打亞洲萬里通萬事達卡,當時迎新期內簽賬首$7,500有$1=2里優惠(即一共15,000里數),可謂全城至抵!渣打仲請來天后鄭秀文擔任代言人,化身做鄭經理,拍咗一系列電視廣告同網上宣傳短片,又大唱《不要驚動阿盈》,引來網民熱論,令唔少人都想申請張來儲里數。而家渣打又推出迎新期後首$30,000消費簽$2送1里,最高可賺多15,000里數,加埋即係30,000里,換遊日韓話都冇咁易啦!

延伸閱讀:全新 渣打亞洲萬里通萬事達卡 迎新即賺15,000里數!

更多渣打信用卡產品資訊,可按此查閱

 

3)8成港人按時清卡數,但9成唔清楚條款

J.D. Power 2016年香港信用卡滿意度研究

Source:J.D. Power 2016年香港信用卡滿意度研究

消費者調查機構J.D. Power進行咗一項有關信用卡滿意度研究,結果發現86%港人都會每月準時還清卡數,比美國同澳洲等國家都高。不過約9成人都表示唔清楚信用卡嘅條款及細則,仲有超過2/3唔係好知換取信用卡獎賞嘅程序,所以錯過咗唔少優惠同回贈。另外,調查亦發現美國運通喺滿意度研究中大幅領先其他銀行排第一,而DBS、匯豐同Citibank則以些微差異緊隨其後。

延伸閱讀:信用卡攻略 大全

了解更多星展美國運通Citibank的信用卡產品

 

4)建行亞洲夥拍香港航空推Fly Away信用卡

建行(亞洲)香港航空Fly Away信用卡

建行亞洲今年6月同香港航空推出建行(亞洲)香港航空Fly Away信用卡,客戶只要成功申請呢張卡後就可以自動登記加入香港航空飛行常客計劃:金鵬俱樂部(Fortune Wings Club),更可憑簽賬賺取FWC積分,本地簽賬每$6=1 FWC積分,而海外消費就每簽$4有1 FWC積分。持卡人及同行親友更可以每年5次免費享用香港航空機場貴賓室「紫荊堂」,甚至以5折FWC積分兌換精選機票添!

延伸閱讀:Fortune Wings Club Vs Asia Miles 邊個儲里數快啲?

了解更多建行亞洲的信用卡產品,可即按此

 

5)Apple Pay、Android Pay登港,銀行推信用卡優惠搶客

Apple Pay同Android Pay今年先後於7月同10月登港,各大銀行紛紛推出信用卡優惠吸客,例如送現金回贈同Coupon 等等。雖然回贈金額未必好多,不過呢類手機支付服務就令俾錢買嘢更加方便快捷,而且仲減低咗信用卡資料被盜用嘅機會,對消費者嚟講都未嘗唔係一件好事!而家仍有個別銀行仲推廣緊Apple Pay同Android Pay優惠。

延伸閱讀:【手機錢包】 Android Pay 攻略 x 優惠【iPhone迷必讀】 Apple Pay 最新優惠全攻略

 

6)匯豐、恒生信用卡繳費優惠 限減至1萬

信用卡發卡量過百萬嘅匯豐同恒生宣布會收窄信用卡積分優惠!恒生由10月開始將信用卡於網上交保費賺取Cash Dollar嘅上限減為每月總額$10,000,但用恒生信用卡於網上繳付其他賬單(但銀行同信用卡服務商戶,或稅務局賬單除外)就仍然可以賺到Cash Dollar。

至於匯豐亦於11月起削減優惠,客戶用匯豐信用卡於網上償還保單貸款將唔會有獎賞錢優惠,而用合資格匯豐信用卡(如匯豐Visa Signature卡)於網上繳費亦只限每月頭$10,000至有獎賞錢。以後用恒生同匯豐信用卡網上繳費時要小心,以免蝕咗啲積分優惠。

按此了解更多匯豐恒生的產品。

 

7)偷信申請信用卡,欺詐集團騙取200萬

住喺舊樓嘅朋友要留意,「偷信黨」詐騙集團有變本加厲嘅趨勢。今年就有報道指騙徒專向無鐵閘、無保安員又無閉路電視嘅舊樓下手,偷取住客信件後偽造身分證同假文件,然後向銀行申請咗近60張信用卡,再瘋狅碌卡買手袋、名牌同手機等貴價商品,結果銀行損失近200萬。警方已經破獲有關集團,但如果你住緊舊樓都要記住要多啲Check住信箱同月結單,以免個人資料被人盜用。

延伸閱讀:【唔見咗卡點算好?】 遺失信用卡 常見問題Q&A

 

8)郵寄月結單唔環保,銀行陸續收費

而家好多人都因為方便同環保嘅緣故已轉用電子月結單Check數,但仍有部分人鍾意收郵寄月結單。不過星展同恒生就宣布2017年1月起會收取郵寄月結單費用,恒生有關服務收費適用於優越理財、優進理財、Green Banking同綜合戶口等個人戶口。如果每個戶口於半年內收到多過2份郵寄結單,每個戶口將收取服務年費$10,下半年有關收費更加至$20。

至於星展銀行就由出年開始向收取信用卡郵寄月結單嘅客戶收取$50,並會於下一年透過信用卡戶口扣賬。另外,一早已收取郵寄結單費用嘅匯豐亦於今年將電子結單及電子通知書服務延伸至定期存款、信用卡結餘轉賬同信用卡超出信用限額等部份。

了解更多星展恒生匯豐的信用卡產品

 

9)全球信用卡消費首次超越現金

信用卡終於取替現金?市場調查機構Euromonitor International指2016年信用卡消費總額將達到23.2萬億,而現金消費總額則為22.6億,表示信用卡消費將首次超越現金。而2015-2016年間亞太地區嘅信用卡消費總額係咁多個地區之中增長得最快,金額高達1.7萬億。報告指呢個情況可以謂係一個里程碑,不過其實過去20年間使用信用卡同電子支付工具嘅人都持續上升,除咗科技發展外,扣賬卡同電子支付興起都係原因之一。

 

10)網購要小心!Visa卡有漏洞?密碼6秒內被破解

網購雖然好方便,但背後都有安全風險!英國有研究發現,駭客可以利用分布式猜測攻擊手法,估算Visa信用卡嘅號碼、到期日期同卡背嘅CVV安全密碼,最快6秒就成功猜中。而Visa嘅支付系統偵測唔到同一張信用卡喺唔同網站上提交無效嘅交易請求,所以黑客可以肆無忌憚咁估信用卡安全資訊,盜用其他人嘅信用卡付款。反觀MasterCard就可偵測得到同一張卡喺唔同網站嘅錯誤輸入次數,所以相對地安全。

對於研究結果,Visa就話佢哋嘅支付系統有多層防偽系統,亦會同發卡機構緊密合作,如果交易情況有異常就會立即通知卡主,若果被盜用信用卡,持卡人亦唔需要為損失負責。

 

想知道更多信用卡嘅優惠資訊?立即使用我哋嘅比較工具,搵出最適合你嘅信用卡!

——

延伸閱讀:【2016大事回顧】香港10大 樓市新聞

想知道最新嘅理財貼士,就要留意MoneyHero.com.hk Blog,同埋緊貼我哋嘅Facebook Page