Clockenflap 2017演出陣容逐個睇+購票攻略

MoneyHero團隊
最後更新 Oct 27, 2017

Clockenflap 2017演出陣容逐個睇+購票攻略

香港每年有許多音樂節,但最引人注目的,始終是演出戲碼最強勁的Clockenflap!好多人會因為三天票價達四位數字,都持觀望態度,想等到完整演出清單出爐先決定買唔買飛,就襯主辦單位啱啱公開完整演出名單,樂迷們今次又會唔會狠下心入手門票?

Clockenflap 2017 活動細節

Clockenflap 2017

Clockenflap 2017 將於11月17至19日於中環新海濱舉行。17日 (周五) 活動時間為下午5時直至晚上11時;而18至19日的活動則由中午12時至晚上11時,購票者可以在指定時間內無限次進出會場。

由依家開始全部係正價售票,不過早啲喺網上購票好過到時walk in,因為網上預購三日門票比walk in平$200架!今次walk in仲要收手續費,而通過ticketflap網上購票都要收每張票$10手續費。學生買飛會有優惠,而十二歲或以下人士更加係免費,但要留意十二歲或以下人士需要成人陪同入場,而一名購票成人只能帶兩名十二歲或以下人士入場。

購票網站:按此進入

Clockenflap 2017門票價格
(現場購票 / 網上預購)

11月17至19日(3天) 11月17日 11月18日 11月19日
成人

$1,940 / $1,720

$1,030 / $930 $1,100 / $1,000

$1,100 / $1,000

全日制學生

$1,280 / $1,080

$670 / $570 $740 / $640

$740 / $640

十二歲或以下

免費

免費 免費

免費

網上購票除咗平啲之外,仲可以賺多啲信用卡回贈,即睇:網上購物 5大最高回贈信用卡

三日演出陣容逐個數!

周五 (11.17) 必聽音樂陣容

周五係上班日,要吸引樂迷入場,演出劇碼自然要有啲份量。Clockenflap今次的周五劇碼,要留意嘅係加拿大嘅才女FEIST,英國天團級樂隊Kaiser Chiefs,以及中國新晉Hip Hop組合海爾兄弟!

型格女聲:FEIST

型格女聲:FEIST

1999年出道嘅FEIST,可以話係獨立音樂樂迷一定聽過嘅女聲,由佢加入加拿大樂隊Broken Social Scene開始為人熟悉。FEIST獨特嘅唱腔,相信大家就算唔知道佢係邊個,聽到都一定記得佢把聲,而佢今年四月就推出最新大碟《Pleasure》,大家記住煲熟佢入場喇!

中國Hip Hop新勢力: Higher Brothers

中國Hip Hop新勢力: Higher Brothers

內地綜藝節目《中國有嬉哈》令大家知道中國嘅Hip Hop音樂發展迅速,但有一隊Hip Hop組合早被一眾樂迷認為不用參加比賽已經有足夠名氣,佢地就係就係來自中國成都嘅海爾兄弟(Higher Brothers)!中國川渝地區因為方言盛行,靈活嘅語言一直讓Hip Hop發展良好,而中國最重要嘅Hip Hop組織之一「說唱會館」就係紮根於此。

海爾兄弟作為說唱會館主要嘅成員之一,更已簽約美國唱片公司並在美國發展,海爾兄弟嘅成員馬思維,其單曲《Flava in ya ear》更曾被Snoop Dogg推介,可以話係最具國際級數嘅中國Hip Hop組合。佢地早前都來過香港演出,當時即場walk in票價都要$360架!

BBC年度新聲:Kaiser Chiefs

BBC年度新聲:Kaiser Chiefs

周五嘅重頭戲無疑係英國嘅Kaiser Chiefs,樂隊於2005年奪得BBC嘅年度新聲,可以算係千禧年後英倫最優秀嘅樂隊之一,其隊員Ricky Wilson更係The Voice UK英國好聲音嘅評審之一。佢地之前嘅專輯如《Education, Education, Education & War》,多數與社會議題息息相關,不過佢地最新專輯《Stay Together》就以感情為主題,唔知又啱唔啱你胃口?

周六 (11.18) 必聽音樂陣容

好多人都當周六先係Clockenflap正式開始,對比周日嘅重頭戲,周六嘅演出就比較多元化,大家都可以留意下港台嘅樂隊組合,支持華語樂壇!

本地最有叫座力樂隊:Chochukmo

本地最有叫座力樂隊:Chochukmo

周六演出嘅香港代表有現今最具舞台感染力嘅Chochukmo,曲風難以定義,有人話佢地係math rock,但佢地每張專輯都會加入新嘅主素,而主音阿水如「怪叔叔」嘅台風,每次演出都可以帶動熱烈氣氛,可以話係香港現今最有叫座力嘅樂隊!

文青之選 Hello Nico

hellonico

如果你唔知邊隊係Hello Nico,你大概好難稱得上係文青。靠網絡口耳相傳而成名嘅Hello Nico於2013年成立,首張專輯《熟悉的荒涼》多次加印,係呢個實體專輯銷情大跌嘅世代可以話係一個奇蹟。這幾年佢地在中港台嘅演出,一般都爆哂場,今次Clockenflap有機會,大家就唔好錯過喇!

電音天團 THE PRODIGY

電音天團 THE PRODIGY

都係個句,你可能唔知邊隊THE PRODIGY,但你應該聽過佢地嘅首本名曲《The Fat of The Land》。廿年前,憑依首歌將rave文化推至全球,THE PRODIGY已經有十九年未黎過香港演出。近年推出新作再次活躍,兩年前佢地更係日本Summer Sonic當壓軸演出,江湖地位無容置疑!

周日 (11.19) 必聽音樂陣容

好多世界知名音樂單位都會喺周日壓軸出場,將Clockenflap嘅演出推至高潮!如果只玩一日又無特別喜好,周日嘅門票會係最抵玩。

惡女紅人:MØ

惡女紅人:MØ

來自丹麥嘅Electrpop唱作女將MØ係周日注目演出單位之一。「MØ」在丹麥語其實係解作「處女」,有趣嘅係佢一直係以惡女性格示人,三十歲未夠,就與Ariana Grande、Major Lazerz、DJ Snake等紅人合作無間,一向備受潮人追捧,今次更係佢首次來港演出!

波希米亞在香港:THE DANDY WARHOLS

波希米亞在香港:THE DANDY WARHOLS

睇THE DANDY WARHOLS,你只要聽一首《Bohemian Like You》就值回票價。推出十五年,《Bohemian Like You》仍是播放率高企嘅作品,依隊來自美國波特蘭嘅indie rock大團,啱啱就推出左第九張專輯,今次黎到香港會演唱新舊作品,如果佢地唔唱《Bohemian Like You》,大家記住唔好畀佢地走啊!

壓軸中的壓軸:MASSIVE ATTACK

壓軸中的壓軸:MASSIVE ATTACK

一睇名單,就知道必定係整個Clockenflap 2017嘅壓軸 — 英國Trip Hop樂隊MASSIVE ATTACK首次來港演出,佢地嘅音樂相信唔需要多介紹,今次除咗係佢地第一次來港,更加係佢地今次巡迴在東南亞地區唯一一場演出,相信唔只香港,鄰近地區嘅好多樂迷,都會因為佢地嘅演出而特地入場欣賞,想可以前排啲,就記住當日早啲去主舞台前霸定位喇!


想了解更多lineup,可以登入官網研究。

延伸閱讀:【聽歌必備】5大香港音樂串流 Apps大比拼

延伸閱讀:香港平靚正 拍拖好去處

延伸閱讀:【IG打卡攻略】香港6個必去文青影相好去處

——

想知道最新嘅理財貼士,就要留意MoneyHero.com.hk Blog,同埋緊貼我哋嘅Facebook Page

MoneyHero團隊 27th October 2017 20557