當你要返朝九晚五（有時重要加埋OT⋯），放左工有時約下朋友，social下，真係會忙到冇時間運動。加上一日大部分時間都坐喺公司，鍛鍊唔到肌肉，真係好難瘦！想要做gym，但入會費月費又貴，返工忙起上黎飯都唔得閒食，要定時定候去到做gym真係唔容易。其實只要每日做20-30分鐘運動，甚至返工嗰陣都可以做下小運動，令身體更健康，順便Keep fit！

可以喺OFFICE做既運動

返office之前其實已經可以開始運動！返工嗰陣不妨早一個站落車，行一段路返工，或者天氣涼啲，公司又近既話，甚至踩單車返工。返返下工當然冇可能突然間做掌上壓啦，但有其他小運動，都可以返工既時候做架。

1. 放鬆腳踭

著得高踭腳多，唔少女仔都有腳踭痛既問題。呢個小運動可以幫到你！坐喺個位既時候，喺枱下面將對腳伸長。將右腳向內轉20次，再向外轉20次，之後就可以換腳再做。呢個運動可以做到你舒服為止，做幾多次都得！

2. 拉腳筋

坐得太耐對腳一定會唔舒服，所以可以時不時拉下腳筋。首先唔好成個pat pat坐住張凳，淨係坐喺邊邊，然後將其中一隻腳伸起，直到同上半身呈現90度，hold住10-20秒之後放低。重覆做大約20次。記住做既時候要坐得直先有用架！呢個小運動一路打緊字或者上緊facebook都做得，又冇人睇到，係咪好方便呢？（不過記住返工唔好玩facebook呀！）

3. 收緊腹部

呢個運動坐或者企喺度都做得，但記得背脊要直，膊頭向後。保持呼吸一致，然後收腹，hold住5秒，之後放鬆5秒。呢個動作又係可以做幾多都得。唔好睇少呼吸同收腹呀！日本好出名既減肥方法，都係靠收腹黎練出腹肌架！

4. 手部運動

做野成日對住電腦打字，好容易會膊頭同手肘痛，所以都要留意做下手部運動。將你雙手伸直，放喺牆上面。然後用手指，好似行路咁，爬上／落牆。記住要向上「行」得有咁快得咁快，但向下就要慢慢「行」。因為你唔止拉緊手脾，重同時拉緊手指同埋手腕架。呢個小運動可以幫你預防腕管綜合症，同埋令到膊頭同手肘冇咁易痛。

5. 行路

你冇睇錯！就係行路咁簡單。因為行路既時候，其實係用緊全身既肌肉。行路既時候要保持背脊挺直，同埋要搖擺雙手。行路就要行直線，同埋多啲上落樓梯。如果你公司喺高層既話，試下早幾層落車立，然後行返公司啦。

————

除左喺公司做到既小運動之外，喺屋企其實都可以用以下５個小運動減肥！

6. 熱身

記住每次做運動之前都要熱身先，等身體準備好，避免抽筋既情況發生。一開始可以好似伸懶腰咁伸高手拉筋，唔好唔記得拉下條頸，可以令自己清醒啲！

7. 弓步蹲 (Lunges)

呢個係其中一種可以練到晒成隻腳既運動。首先前後腳企，後腳伸直，之後向前蹲低，記得前腳要保持90度彎曲！hold住10秒，之後換腳，每隻腳做10組。

8. 深蹲 (Squats)

深蹲可以練到大腿肌肉同埋臀肌，亦即係困擾好多女士既pat pat！首先兩隻腳分開少少企好，個身要挺直，手放頸後面。跟住好似坐無影凳咁，膝頭曲起，慢慢向後坐。呢個step最重要既係要保持背脊挺直。hold住10秒之後一面吐氣，一面企起身。咁樣做10次就得架啦！

9. 捲腹 (Crunches)

捲腹個名聽落有啲怪，但其實佢係進化版既sit-up，主要用黎練腹部。首先，訓喺地上面，雙腳平放，將手交叉放喺心口，或者放喺頭後面。然後將上半身抬起，拉向膝頭方向。但記住唔好掂到膝頭，如果唔係就會變左sit up架啦！只要抬起到上半身同大腿似V字形，就可以訓返低。同樣都係做10次就夠。

10.　掌上壓

掌上壓其實有分好多種，但我地就由最基本既做起。面向地下訓低，將雙手手掌平放喺地下，兩隻手既距離應該比你既膊頭闊少少。雙腳都係少少分開，保持身體由頭到腳成一直線。之後慢慢伸直手臂，但同時保持身體挺真。壓落去既時候越低越好。一開始可以做10次先，到你覺得習慣左，就可以用5個做單位，逐漸加多啲。

———

睇完上面呢10個小運動之外，係咪覺得唔使去做Gym都可以保持健康同埋keep fit呢？生活得健康啲，咁醫療費用，例如醫療保險既保費都可以比少啲啦！每個星期做2-3次呢啲小運動，其實已經可以好大幫助。聖誕同新年因為食得太多好野而肥左少少既話，都可以用佢地黎減肥架。快啲試下啦！（好似小編一路打呢篇野，其實一路做緊收腹運動架！）