無論係為左休息一下，定係為左增加人生經驗，香港人鍾意去旅行就係人都知架啦。以前大家都會慣左跟團旅行，或者一班人一齊去旅行。不過，近年就越來越多年輕人迷上左一個人去旅行。
自己一個去旅行，唔多唔少都會有啲怯，但如果你想出走一下，離開每日既例行公事，同埋試下新野，相信一個人旅行可以為你帶黎好多收獲！MoneyHero為你列出左5個一個人旅行既好處，睇下點解solo travel會風靡咁多人！
1. 享受寶貴的獨處時間
雖然我地未必為意，但每日營營役役既生活對都市人黎講真係有好多壞影響。有時遠離一下煩囂，同埋每日撞口撞面既人，就可以比多啲空間自己，放鬆一下，重新評估自己既生活。被生活推著走既感覺唔好受，所以去旅行既時候，如果一日廿四個鐘都屬於自己，放低工作同責任，就真真正正咁休息一下，享受寶貴既獨處時間。講到尾，咁先係旅行的意義嘛？
2. 唔使迎合其他人
唔使迎合其他人應該係一個人旅行既最大好處啦。同其他人去旅行，或者跟團，好多時會被迫去啲你冇興趣既地方，或者好似行軍打仗咁去晒所有景點，先可以休息。不過，一個人去旅行就可以自己plan行程，鍾意幾時做咩都得；行到攰就抖下，想食就食。鍾意成日流連喺博物館入面又得，坐喺沙灘咩都唔做都得，唔使聽人支笛！平時已經要成日遷就其他人，去旅行點解唔對自己好啲，做返啲真正想做既野？
3. 認識新朋友
一個人去旅行聽落好似好孤獨咁，但其實反而會多左機會識新朋友，例如當地人或者其他遊客。如果跟團或者一堆人一齊去旅行，好少會分散行動，結果就令到成個旅程都淨係同返自己人講野。但當你一個人去旅行，每一步都係一個大冒險。如果你放開心胸（當然同時要注意安全）， 大膽啲同其他人溝通或者傾計。旅途上會有好多意想不到既邂逅，可以令旅程變得更難忘。
4. 發掘更多有趣既旅行方式
當你自己計劃旅程既時候，就可以跟返自己既喜好同步履。重可以唔用一貫既方法，跳出平時既框框，試下其他有創意既旅行方式！例如租單車代步，見到得意既鋪頭或者餐廳就停低睇下，好好咁欣賞下身處既城市。重可以試下其他特別啲既行程，例如行山或者坐過山車等等⋯除此之外，唔好淨係住酒店，可以試下唔同民宿、B&B、甚至hostel，都係難得既體驗！
5. 更了解自己
如果你冇試過自己一個人旅行既話，呢個係一個鍛練自己既大好機會。當然啦，想要令自己變得更美好，唔一定要自己去旅行，因為話晒都有相當既風險存在。但自己走出去，面對一個全新既環境（無論時間長短），都會教到你好多野，特別係一喺常生活，或者團體生活入面，你未必察覺到既野，重可以令你既自信心同埋社交技巧大大提高添！
回到文章
