北投 溫泉攻略:嚴選4大高質抵住溫泉酒店 2017

|Posted by | 全部文章, 品味生活
Tags: , , , , , , ,

北投 溫泉攻略:嚴選4大高質抵住溫泉酒店 2017

提起台北溫泉,相信好多人第一時間都會諗起 北投 !皆因呢度已經發展超過100年,仲係唯一一個坐捷運就可以到達嘅溫泉區,成為遊客浸溫泉嘅首選之地,一啲都唔出奇。去到北投,大部分遊客都會選擇住一晚,不過最出名嘅加賀屋、麗禧、三二行館,全部都每晚成幾千蚊港幣,少啲budget都搞唔掂……唔緊要!MoneyHero.com.hk為大家精選4間性價比極高嘅北投溫泉酒店,每人每晚平均一千蚊都唔洗,就可以訓一晚兼歎私家溫泉!


日式無印簡約風|水美溫泉會館

北投溫泉:日式無印簡約風|水美溫泉會館

自問鍾意無印簡約風嘅話,咁你一定唔可以錯過位於新北投親水公園旁邊嘅水美溫泉會館。呢度有別於奢華精緻嘅溫泉酒店,反而以大地色系為主調,配以東方味十足嘅傢俬擺飾,簡約俐落嘅裝修就足以令人好放鬆。

北投溫泉:日式無印簡約風|水美溫泉會館

除咗房間設有私人溫泉浴池,水美溫泉會館最大特色係「地中海式大眾湯」,跟住日本傳統裸湯,男女都要除哂衫浸溫泉 (當然係分開浸),每位住客可以免費使用大眾湯一次。大眾湯亦非只有一個溫泉池,仲有齊蒸氣室、烤箱、冷泉池,而各位女士們嚟到呢度仲會比男士更加著數,因為女湯特設SPA水療池同埋氣泡按摩椅,比男湯更為豐富!

北投溫泉:日式無印簡約風|水美溫泉會館

另外,唔少住客都會去埋酒店嘅水美食府享用晚餐,皆因店內可以食到源自日治時代嘅「酒家菜」,強調選用地道食材、講究刀工排盤,絕對值得一試。

地址:台北市北投區光明路224號
電話:+886-2-2898-3838
房價:雙人房NT$6,000起(優惠價NT$4,800起)
網站:https://www.sweetme.com.tw
交通:捷運新北投站,右轉步行3分鐘到達酒店。

走入羅馬浴場|皇家季節酒店北投館

北投溫泉:走入羅馬浴場|皇家季節酒店北投館

北投溫泉:走入羅馬浴場|皇家季節酒店北投館

假如一般日式溫泉已經滿足唔到你,試吓皇家季節酒店嘅羅馬浴場又如何?2006年成立嘅皇家季節酒店,目前全台灣總共有3間分館,其中北投館採用豪華歐洲宮廷風設計,成功喺北投溫泉酒店嘅一級戰區突圍而出,吸引唔少人慕名而來。

北投溫泉:走入羅馬浴場|皇家季節酒店北投館

為咗貫徹歐洲主題,酒店房亦用上希臘神話嘅人物嚟命名,例如雅典娜客房、阿波羅客房、維納斯湯屋,而且每間房嘅浴室都以大理石人手打造而成,泉水由獅頭口中流出,好有羅馬浴場feel!酒店由客房到大堂都極有氣派,但價錢就比想像中親民,一般定價為NT$4,600,性價比高。

地址:台北市北投區中山路26號
電話:+886-2-2896-9798
房價:雙人房NT$4,600起 (淡季平日NT$2,660起)
網站:https://royalseasons.leefanggroup.com
交通:捷運新北投站,預約接駁車到達酒店。

溫泉加入先進科技 | 漾館時尚溫泉旅館

北投溫泉:加入先進科技 | 漾館時尚溫泉旅館

位於溫泉路上嘅漾館時尚溫泉旅館,雖然規模唔算大,但最特別嘅地方係引入咗好多新科技同埋意念,例如酒店全館都採用負離子空氣系統,而且利用創新嘅湯泉管理學,一個四人湯池只需要六分鐘就可以注滿泉水,成為區內溫泉業界嘅先驅之一!

北投溫泉:加入先進科技 | 漾館時尚溫泉旅館

酒店房主打原木設計,配上好有意式風情嘅紅白色系傢俬,感受型格又夠chill。除此之外,酒店得13間房,但係每間面積都非常闊,連浸溫泉嘅浴缸都特別大,抵讚!

北投溫泉:加入先進科技 | 漾館時尚溫泉旅館

酒店雙人房價錢唔算貴,提提大家,可以留意住酒店嘅Facebook page,佢地成日推出震撼優惠價,例如11月就有Late Check in計劃,閒日8點入住雙人房只需要NT$2,660起,絕對係超值之選。

地址:台北市北投區溫泉路63號
電話:+886-2-2891-1118
房價:雙人房NT$6,888起
網站:https://www.aquabella.com.tw
交通:捷運新北投站,步行1分鐘到達酒店。

時尚中國風設計  | 荷豐溫泉會館

北投溫泉:時尚中國風設計 | 荷豐溫泉會館

現今型格精品酒店當道,走中國風設計嘅酒店少之有少,而荷豐溫泉會館就係其中一間。酒店外形係區內極罕見嘅中式樓閣設計,室內設計大量採用中式藝術裝飾,從內到外都好有中國特色,感覺古色古香,簡樸雅致得嚟亦富有格調,住得舒服。

北投溫泉:時尚中國風設計 | 荷豐溫泉會館

北投溫泉:時尚中國風設計 | 荷豐溫泉會館

咪以為酒店行中國風設備就會又傳統又老套!酒店所有客房附設特大泡湯浴池,就算一家大細一齊浸都完全無問題。另一方面,酒店亦引入台北意法料理界名廚ABU經營蔬之膳蔬食餐廳,美食巧妙結合溫泉,健康輕盈,符合養生宗旨。有大浴池又有fusion養生餐,仲要性價比高,最啱帶埋小朋友一齊嚟!

地址:台北市北投區溫泉路銀光巷1號
電話:+886-2-2897-9955
房價:雙人房NT$5,600起 (淡季平日NT$3,360起)
網站:https://www.lotusspa.com.tw
交通:捷運新北投站,酒店提供免費接送服務。

延展閱讀:大阪市區+近郊溫泉旅館推介
延展閱讀:Wifi旅遊上網必備:全港最平 Wifi 蛋租借攻略

去旅行,記得買定旅遊保險!按此前往MoneyHero旅遊保險平台,一次過睇晒邊間最抵、保障最全面,經我哋買仲有額外優惠添!
——

想知道最新嘅理財貼士,就要留意MoneyHero.com.hk Blog,同埋緊貼我哋嘅Facebook Page