新年期間，大家都趕住去做節或者拜年，唔使問都知坐地鐵一定迫到死，開車都逃唔過塞車一刧架啦。今年有４日農曆年假，除左香港人會四圍去玩之外，睇怕都有唔少內地人會因為信用卡優惠之類，湧黎香港買野。

喺人多車多既情況下，如果你諗住喺農曆年開車既話，就要記住以下呢幾點，安全駕駛， 平平安安過羊年 。

小心行人

新年既人流一定比平日多，所以撞到人既機會都會高左。根據運輸署2013年既統計，行人因為交通意外而死亡既數字係高過司機或者乘客架！大部分涉及行人既交通意外多數係喺啲細街度發生。所以記得要保持安全既車速，咁就可以減低撞到行人既機會。

以下呢張圖係由澳洲新南威爾斯州交通安全中心發表既，喺入面可以睇到，架車開得越慢，行人存活既比例就越高。

切勿酒後駕駛

新年一定有好多聚會，而且唔少人都會因為現場氣氛，或者其他人邀請而飲酒。如果你喺聚會既時候飲左酒，就最好坐的士啦！

飲酒會令你既反應變得遲鈍，所以見到紅燈之後，踩停架車既時間都短左。喺香港2013年既20,596宗交通意外入面，總共有588宗係因為行人疏忽，20宗係因為酒後駕駛。雖然酒後駕駛唔係最主要既交通意外成因，但你都唔想因為酒後駕駛撞到人而後悔一世，莫講話重要坐監。所以都係小心駛得萬年船，飲左酒就唔好開車。

避免疲累時駕駛

新年要四圍去拜年，走走踏踏，又要買禮物，真係咪話唔攰呀。所以好多時到夜晚開車返屋企既時候其實已經好攰。但其實疲累時駕駛同酒後駕駛一樣咁危險！如果你要開好耐車先返到屋企既話，最好同其他識開車既人一齊，咁喺攰既時候都可以有人頂上。如果你自己一個開車，好攰既時候千祈唔好死頂，最好停埋一邊抖一抖，先再出發。

———

農曆新年應該係同屋企人、朋友享受節日同埋假期既時候。雖然四圍拜年探親開車係會方便啲，但開車之前都要留意自己有冇飲酒，或者會唔會太攰集中唔到精神。咁就可以安全駕駛，平平安安過羊年。

MoneyHero仝人祝你新既一年身體健康，大吉大利！