有冇覺得日做夜做都係為左交完一張帳單又一張？一出糧啲錢已經冇左一大截，個感覺真係好差。其實諗真啲，入面有幾多係必要支出？雖然2015年就快過左1個月，但宜家開始計劃今年既理財大計，都未算遲！
想避開財務陷阱，第一步就係要檢視一下你宜家用緊既唔同收費服務！即刻一齊睇下有啲咩陷阱要小心！
被優惠蒙蔽雙眼
適當咁利用優惠同埋減價係好事，我地個blog都有好多教你用盡唔同優惠既方法。不過，如果你唔係真係需要嗰樣野，就千祈唔好比「優惠」同「減價」兩個字呃到！例如本身你好想要一件大約$400既衫，宜家做緊優惠$800有三件，如果你買夠$800，其實係比左一倍價錢，買多左兩樣唔想要既野放喺屋企。所以下次喺商場見到有優惠或者減價，記得停一停，諗一諗，避免使左多餘錢！
信用卡獎賞及收費
你宜家用緊既信用卡係咪可以根據你既消費習慣，幫你賺到最多既獎賞回贈？用少少時間去睇返你舊年啲錢最多用左去邊，就知應該搵咩類既信用卡。如果你買日常用品使得最多錢，搵返張喺超級市場、百貨公司等等買野有獎賞既信用卡就最抵啦。
另一樣要留意既野係，計左利息同其他收費之後，你用呢張信用卡係咪真係有賺？如果你既年利率高過回贈率，咁你宜家張卡就唔抵用啦。你可以比較唔同信用卡，搵出最啱你、最抵既一張卡。
收費電視台
收費電視既月費其實都幾貴下，如果唔係經常睇，好似會晒左啲月費咁。好多人成日諗住比左錢先，有時間就會睇或者想多個台㨂，但其實可能放工返到屋企已經攰到咩都唔想做。咁不如爽快啲，cut左個台佢啦！話晒宜家上網都好容易搵到唔同免費節目或者電影，未必需要收費電視。另外，可以留意下一啲收費電視加埋寬頻既package，會比分開申請平啲架！
寬頻綁約期
申請寬頻多數有個綁約期，如果中途轉會，可能會罰錢架！個約夠期搵其他寬頻既時候記得格下價，睇下佢既速度係咪快啲。有時甚至可能買寬頻送收費電視，抵過分開申請。
手機漫遊費
今時今日，冇手機可能好難喺香港生存。相信大部分人都係同電訊公司有簽約，每個月既DATA同分鐘有限制。其中一個要小心既地方係：你個PLAN包唔包漫遊（包括通話同上網）？喺去旅行之前一定要check清楚漫遊既價錢，如果唔係收到張單真係會貴到嚇死你。
同寬頻一樣啦，手機PLAN都有綁約期。如果你搵過第二間電訊公司，有啲可能會有優惠比新客，服務好過舊台，上網快過舊PLAN。所以未必要用死一個台！
上台買機係另一個好選擇，唔止有新機用，重可以有唔同回贈。不過每間電訊既價錢都可能唔同，所以都係嗰句啦，行多幾步，睇多幾間先好決定。
醫療費用
好多人都會覺得醫療保險唔係必要既費用，尤其係年輕人，會覺得自己咁後生咁健康，唔會有咩事。但諗真啲，如果你真係TOUCHWOOD有咩大病，你係咪負擔得起？雖然睇醫生／入醫院絕對唔會係交電費咁頻密既事，但香港既醫療費可以話係全世界最貴之一，萬一真係要拎一筆錢出黎醫病，可能真係會坐食山空。要避免呢個突如其來既陷阱，最好買返一份醫療保險，比個保障自己。
汽車保險
雖然宜家油費回落返少少，但揸車既開支唔止係油費！記得不時比較一下其他汽車貸款，搵出最好既PLAN。如果你舊年冇CLAIM過保險，可以大膽啲，問下經紀保費有冇優惠。
－－－
喺2015年，除左努力做野同諗方法慳錢之外，記得儲起一部分收入，應付退休之後既支出。想要多啲閒錢用，就要由每個月你使得最多錢既費用開始，檢討下係咪值得繼續。之後就係四圍格下價，咁先可以慳得最多！
－－－
回到文章
